Kex tumen tu baantail zona maaya tu méek’tankaajil Tulum ts’o’ok u ts’a’abal ka’ap’éel kúuchilo’ob ts’akyaje’, jach ma’ ya’ab ko’olel ku bini’ ti’al u xak’alta’al ti’ob yéetel u séeba’an ilko’ob wa tsaayal ti’ob wa ba’ax k’oja’anil, je’el bix cervicouterino ts’unusi’.
Te’e tu winalil agosto yaniko’ona’, táan u beeta’al tu mola’ayil Servicios Estatales de Salud u nu’ukbesajil “Quintana Roo contra el Cáncer de Cuello Uterino 2022, #MujeresSinCáncer #ContraElCáncerYoActúo”. Le k’oja’anila’ chéen leti’le ku béeytal u ts’aatáanta’al ti’al ma’ u tsa’ayal, le beetik k’a’anan u xak’altik wíinik u wíinkilal.
Sonia Vargas Torres, máax jo’olbesik Salud Municipale’, tu jets’aj tu méek’tankaajil Tulume’ yaan óoxp’éel tu’ux je’el u páajtal u bin ko’olel ti’al u séeb ila’al wa tsaayal ti’ le k’oja’anila’: u kúuchil Centro de Salud, Unidad Médica de Cobá yéetel Hospital Comunitario de Chanchen Primero.
También te puede interesar: Poco interés en zona rural para detectar a tiempo el cáncer cervicouterino
Meyajnáale’ ti’ ya’alaje’ le óoxp’éel kúuchilo’obo’ táan u táakpajaolo’ob ti’ u nu’ukbesajil Servicios Estatales de Salud ti’al u béeytal u beeta’al estuudios xma’ bo’olili’. Ba’ale’, yóok’lal ba’ax ku beeta’al ti’al u yojéelta’ale’, ko’olele’ ma’ tu bin tumen su’ublak.
Tu ya’alaje’ te’e zona maayao’ ts’o’ok u ts’a’abal u nu’ukulil k’a’abéet ti’al u ts’aatáanta’al le k’oja’anila’ yéetel uláak’o’ob, ba’ale’ ma’ ya’abach máak ku bini’. Le beetike’, tu páayt’antaj ko’olel yaan u ja’abil ichil 25 tak 64, ti’al u beetik beey táan u ts’a’abal xma’ bo’olilo’.
Beey túuno’, Mayra Sandoval, máax jo’olbesik Centro de Salud ti’ u méek’tankaajil Tulume’, tu ya’alaje’ táan u ts’aatáanta’al tuláakal kaaj, ba’ale’ te’e winala’ mu’uk’ankúunsa’an meyaj ku beeta’al ti’al u séeb ila’al wa tsaayal le jejeláasil ts’unusa’.
Uláak’ ba’al tu ya’alaje’, ma’ bin ojéela’an ti’ jaytúul ko’olel tsaayal ti’ le k’oja’anila’, tumen ma’ ya’abach ti’ leto’ob ku beetiko’ob u pruuebail ti’al u yojéeltiko’ob wa yaan ti’obi’.
U meyajnáalilo’ob mola’aye’ ku ya’aliko’obe’ u tsa’ayal Virus del Papiloma Humano (VPH) leti’e’ yáax ba’ax beetik u yantal ti’ ko’olel cervicouterino ts’unus, le beetike’ ku páayt’anta’alo’on ti’al ka xi’iko’ob ka beeta’ak u prueebail, tumen ti’ le winalil agosto yaniko’ona’ xma’ bo’olil u ts’a’abal.
Xak'alutskíinsa'an tumen: Sasil Sánchez Chan
