Máaxbo’ob beetik jejeláas meyajo’ob ti’al u k’a’amaj ajxíinximbal máako’ob tu jáal ja’ilo’ob Tulume’, yanchaj u je’elsik u meyajo’ob tumen jach táaj k’amchaj cháak k’áax te’elo’ ti’ le ts’ook k’iino’oba’.
Ichil ba’ax yaan u yil téetel máaxo’ob ku meyajo’ob yéetel cheeme’, je’el bix Jorge Alberto Balam Quiñónez, máax táaka’an ichil u múuch’il “Dorados de Playa Maya”, tu tsikbaltaje’ ti’al u taal u yáak’abtal viernes ka’aj jets’a’ab tumen Capitanía de Puerto yaan u k’a’alal ti’al cheemo’ob ma’ táan u píitmáansik 15 metros u chowakil, tumen ichil ba’ax a’alab tumen Protección Civil ti’ u méek’tankaajil Tulume’, chich u yáalkab iik’, ts’o’okole’ tikin, óol chokoj yéetel uumedóo, tumen beey táan u yila’al u taal ichil u ja’ilo’ob Caribe.
Máax k’áatchibta’abo’ tu ya’alaje’, u ka’anal yúumbal k’áak’náabe’ ma’ táan u cha’ak ka’ach u xíimbalkunsa’al máak ti’ mejen cheemo’ob, le beetik le sábado máanika’, láayli ma’ xan béeychaj u meyajo’obi’.
También te puede interesar: Paralizados servicios turísticos en playas de Tulum por lluvias
Tu tsikbaltaje’ yóok’lal bix ucha’an ba’al tak walkila’, leti’obe’ táan u máansiko’ob talamil.
Ka’alikil túune’, Sergio Alcalá García, máax ku meyaj tu kúuchil Spa ichil “Playa Paraíso” tu kúuchil Parque Nacional, tu ya’alaje’ ma’ béeyak u meyajo’obi’, tumen óoli’ mina’an mix máak ku k’uchul te’elo’ yóok’lal u seten k’áaxal cháak.
Walkila’, ts’o’ok u yokolo’ob ti’ le winal tu’ux ku asab yu’ubal ja’, tumen leti’ beetik ma’ táan u béeytal u k’uchul ajxíinximbalo’obi’.
Ichil ba’ax a’alab tumen Dirección Municipal de Protección Civil tu kaajil Tulume’, nookoy u máan k’iin, chokoj u yooxol yéetel yaan jump’íit iik’. Kex beyo’, tukulta’an láayli’ yaan u yantal le k’a’amkach cháako’; ja’atskab k’iin yéetel ma’ jach táaj yaan u yantal áak’ab wa kéen káajak u píik’il.
Xak'alutskíinsa'an tumen: Sasil Sánchez Chan
