Maanal 26 u p’éel u múuch’kabilo’ob kolnáalo’ob, maayaob yéetel ajmeyajo’ob ti’ u péetlu’umil Yucatáne’ táan u páayt’antiko’ob máak ti’al u táakapajal ichil Foro por la Defensa del Territorio, la Tierra, el Agua, el Ejido, la Soberanía Alimentaria, yaan u beeta’al le 8 ti’ octubre ku taala’, tu kúuchil Sindicato de Telefonistas.
Ichil ba’ax a’ala’an tumen máaxo’ob beetik múuch’tambale’, yaan u tsikbalta’al jejeláas talamilo’ob ku máansik wíinik, yóok’lal ba’ax yaan u yil yéetel k’áax, beyxan lu’um yéetel poliitikóo ba’al, tumen ku jelbesiko’ob u kuxtal kolnáalo’ob, k’áaxil máako’ob yéetel je’el máaxak kajnáalil; yéetel tsikbale’ yaan u kaxta’al u ts’aatáanta’al ba’ax je’el u páajtal u beeta’al ti’al u yutstal ba’ax ma’ patali’, yéetel tu jo’oloje’ yaan u k’u’ubul ti’ u jo’olpóopilo’ob kaaj.
En español: : Pobladores y activistas de Sitilpech cierran calle del Poder judicial
Pablo Duarte Sánchez, máax táaka’an ichil Unión Nacional de Organizaciones Regionales Campesinas Autónomas (Unorca), tu tsolaje’ k’a’anan u beeta’al le tsikbalo’oba’ ti’al u yojéelta’al talamilo’ob yaan, je’el bix u seen k’askúunta’al ja’ tumen u kúuchilo’ob u tséenta’al k’éek’eno’ob, yéetel u kaláanta’al k’áax; uláak’ ba’al k’a’anan u tsikbalta’ale’ leti’e’ jejeláas bix je’el u béeytal u pak’ik máak ba’al u jaantej.
Duarte Sáncheze’ tu ya’alaje’ yaan u yantal kamp’éel múuch’ilo’ob tsikbal, ti’ le yáaxo’ yaan u tsikbalta’al k’áax yéetel bix u kaláantik máak u ba’alumbáaj, ba’ax ku beetik Noj Lu’um yéetel beyka’aj u muuk’il yaan ti’ le éejidoo’; u ka’ap’éelile’ yóok’lal u talamilo’ob ja’, bix u k’askúunta’al, máakalmáak u páajtalil kaajo’ob; u yóoxp’éelile’ yóok’lal bix u k’askúunta’al lu’um; yéetel u ts’ooke’ yóok’lal bix u beetik wíinik ba’al u ti’al, beyxan bix u tséentikubáaj.
Ba’ax kun chíikpajale’ yaan u k’u’ubul ti’ u yóox jaatsil meyaj jo’olpóopo’ob ti’al u beetiko’ob wa ba’ax yéetel, tumen yéetele’ yaan u béeytal u ts’aatáanta’al u tuukul kaaj.
Xak'alutskíinsa'an tumen: Sasil Sánchez Chan
