U xoknáalilo’ob Universidad Autónoma de Yucatán (UADY) yaan u béeytal u yoksik u ju’unilo’ob ti’al u k’áatiko’ob u kréedensyalil SITUR ti’ Internet, ti’al ma’ u yantal u bino’ob tak tu’ux yaan le mola’ayo’.
Xoknáalo’ob ti’ le najil xooko’ káaj u much’iko’ob firmas ti’al u béeytal u ts’a’abal u kúuchil meyaj SITUR te’e najilo’ob xooko’ ti’al u páajtal u yoksik u ju’uno’ob ti’al u túumbenkunsiko’ob créedensyal k’a’abéet ti’ob ti’al u bo’otiko’ob chúumuk ti’ le ku tojoltik u máano’ob ti’ kamion.
“Ma’ táan k-k’áatik ka yanak u jach táaj noj ba’alil kti’al, mix xan ka si’ibiki’, chéen ka chíimpolta’ak kpáajtalilo’ob”, beey ts’íibta’ab ti’ jump’éel nook’ jts’a’ab tu meesail tu’ux káaj u mu’uch’ul u fiirmasil máak, tu najil xook Facultad de Ciencias Antropológicas.
Jayp’éel k’iino’ob paachile’, ti’ reedes sosyalese’, u múuch’kabil Frente Independiente de Resistencia Estudiantil (FIRE) tu k’a’aytaje’: “Úuchik u yantal múul meyaj, péek óol yéetel u muuk’ xoknáalo’obe’, tbéeykunsaj u tse’elel u ju’unil constaansya éeskolar ti’al u béeytal u ts’a’abal le kréedensyalilo’, ts’o’okole’ tbéeykunsaj u béeytal u k’áata’al ti’ Internet, ti’al ma’ u yantal kbin tak tu’ux yaan u kúuchil SITUR”.
En español: Estudiantes de la UADY podrán tramitar credencial del SITUR en línea
Ichil ba’ax tu ya’alaj u múuch’kabil xoknáalo’obe’, le je’elo’ béeychaj tumen FIREe’ tu túuxtaj jump’éel ts’íib ti’ Dirección de la Facultad de Ciencias Antropológicas tu’ux k’áata’ab le ba’ax béeykunsa’abo’, ts’o’okole’ jts’a’ab xan jump’éel u kúuchil SITUR te’e najilo’ob xooko’obo’.
“Kex tumen le ts’ook ba’ale’ ma’ béeychajaki’, le ba’ax ts’o’ok u ts’a’abalo’ láayli’ noj ba’al, tumen beyo’ ma’ jach talam u béeytal u yantal u kréedensyal xoknáalo’ob”, tu ya’alaj múuch’kabil.
Beey túuno’, ti’al u ka’a chúumukil octubre kéen ts’a’abak meyaj u kúuchil ti’al u béeytal u k’áata’al ti’ Internet. Yaan u k’u’ubul tumen Instituto de Movilidad y Desarrollo Urbano Territorial (Imdut), tu najil xook Campus de Ciencias Sociales, Económico Administrativas y Humanidades ti’ u noj najil xook UADY, ti’al xoknáalo’ob ts’o’ok u k’áatiko’ob u ti’alo’obi’: 24 yéetel 25 ti’ octubre, 30 ti’ noviembre yéetel u yáax k’iiinil diciembre ti’ le ja’aba’.
Xak'alutskíinsa'an tumen: Sasil Sánchez Chan
