Ichil u k’iinil 19 ti’ septiembre tak 30 ti’ noviembree’, u mola’ayil Instituto Nacional de Estadística y Geografía (Inegi) táan u beetik u áagropekuario xookil 2022 ichil tuláakal u noj lu’uml México, le beetike’ páayt’anta’ab tuláakal máaxo’ob meyajtik lu’um ti’ lalaj péeltu’umo’ob.
Le p’isk’iinil máaniko’, máax jo’olbesik u mola’ayil Desarrollo Agropecuario, Rural y Pesca (Sedape) ti’ u péetlu’umil Quintana Roo, Linda Cobos Castro, tu much’ajubáaj yéetel máax jo’olbesik Inegi te’e péetlu’umo’, Carlos Fernando Novelo Vela, ti’al u yojéeltik bix u bin le meyajo’. Cobos Castroe’ tu ya’alaj xook ku beeta’ale’ yaan u ts’áak u páajtalil u yojéelta’al bix yanik ba’al ichil u meyajil k’áax yéetel lu’um te’e péetlu’umilo’, beyxan bix le lu’um tu’ux ku beeta’al le meyajo’, máax ti’alintik yéetel bix u k’a’abéetkunsa’al le lu’umo’.
En español: Convoca Sedarpe QRoo a participar en Censo Agropecuario del Inegi
Beey túuno’, máax jo’olbesik meyaj te’e Inegio’ tu ya’alaj tu péetlu’umil Quintana Rooe’ yaan kex 35 mil 726 u p’éel k’áaxo’ob much’ik óoli’ 13 mil 067 u p’éel u úunidadesil meyaj. Tuláakal ba’ax kun ojéelbil ti’ le xooko’ yaan u yáantaj ti’al u séebkunsa’al meyaj ku beeta’al tumen Sedarpe ti’al u beyo’, u múul meyajta’al mokt’aano’ob, ichil mola’ayo’ob, ajxak’al xooko’ob, najilo’ob xook, ichil uláak’o’ob, ti’al ka kaxta’ak u yutsil u kaajilo’ob Quintana Roo.
Beey túuno’, máax jo’olbesik Sedarpee’, tu k’áataj ka much táakpajak kaaj ti’al u beeta’al le xookila’, tu’ux táan u meyaj 62 u p’éel ajk’áatchi’il máako’ob; uláak’ 13 u túul máako’obe’ yaan u xíimbaltiko’ob najo’ob yaan ti’ mil 394 u p’éel mejen kaajo’ob, tu’ux yaan óoli’ 15 mil kajnáalo’ob.
Beyxan yaan u k’áatchi’ibta’al k’áaxil máako’ob kaja’ano’ob Cozumel, Felipe Carrillo Puerto, Chetumal, Cancún, Alfredo V. Bonfil, Playa del Carmen, Puerto Aventuras, Tulum yéetel Puerto Morelos.
Xak'alutskíinsa'an tumen: Sasil Sánchez Chan
