Rosita Escobedo Campos, máax jo’olbesik Sistema para el Desarrollo Integral de la Familia (DIF) tu méek’tankaajil Solidaridade’, tu ts’áaj k’ajóoltbile’ te’e tu’ux ku meyajo’ yaan 500 u p’éel máastografias ku yutstal u beeta’al xma’ bo’olil, ti’al ko’olel kaja’an te’elo’. Le je’ela’ táaka’n ichil meyajo’ob ku taal u beeta’al yóok’lal winal tu’ux ku ts’aatáanta’al u yilik máak ma’ u tsa’ayal ti’ u ts’unusil iim.
Leti’e’ tu ch’a’achibtaj u k’a’ananil u séeb ilik máak wa tsaayal ti’ le k’oja’anila’ tumen le je’elo’, je’el u yáantaj ti’al u yáanta’al máak yéetel; tu páayt’antaj ko’olel ti’al u táanilkúunsik u toj óolal, tumen ya’abach juntéenake’ ma’ tu séeb bino’ob yiknal ts’akyaj tumen saajak u yojéelto’ob ba’ax kun a’albil ti’ob. Meyaj ku beeta’al ti’al u páayt’anta’al kaaj ka u xak’alt u wíinkilal ti’al u yilik wa yaan ti’, wa ma’, unaj u beeta’al, bul ja’ab, ma’ chéen ti’al u winalil octubre.
Elia Vidal Dircio, máax jo’lbesik Servicios de Salud ichil le mola’ayo’ tu ya’alaje’, ti’al u béeytal u beeta’al ti’ ko’olel le máastografia xma’ bo’olilo’ k’a’abéet: ko’olel yaan u ja’abil ichil 40 tak 72, kaja’an tu méek’tankaajil Solidaridad (unaj u ye’esiko’ob yéetel INE), beyxan u ts’íibtik u k’aaba’ob villa amarilla, yaan tu kúuchil DIF ti’ le kaajo’, wa ma’e’, u t’aan tu nuumeroil 800 343 2020, tu súutukil 7 ja’atskab k’iin, tak 7:30 áak’ab, lunes tak viernes.
En español: Ofrece DIF Solidaridad 500 mastografías gratuitas: Conoce requisitos
Máax kéen u k’áat ka beeta’ak ti’ le estuudioo’ yaan ya’alal ti’ob ba’ax k’iinil kéen p’áatal; DIFe’ yaan xan u bo’otik u páasaje ti’al u bino’ob tak tu’ux kun beetbil le estuudioo’ yéetel ba’ax kun chíikpajale’ yaan u ts’a’abal k’ajóoltbil ti’ jo’oloj 24 ooras. U beeta’al ba’al beya’ jach ku yáantaj tumen ma’ tu xáantal kéen ojéelta’ak ba’ax kun chíikpajal, tumen wa ka beeta’ak tu mola’ayil toj óolale’, ku xáantal ichil jump’éel winal, tak óoxp’éel.
Xmeyajo’obe’ tu ya’alajo’obe’ ts’a’aban meyaj xan u kúuchil Kiosko Rosa; le je’ela’ jump’éel nu’ukbesaj táan u beeta’al tu winalil octubre ti’al u ts’a’abal ojéeltbil k’a’anan ba’alo’ob ti’ kaaj, beyxan ti’al u beeta’al siitáas ti’al le máastrografiao’. Ti’al u xak’alta’al u kúuchil yéetel ba’ax súutukil u meyaje’ ku páajtal u yokol máak te’ela’: https://bit.ly/3T8ua3B.
Xak'alutskíinsa'an tumen: Sasil Sánchez Chan
