Te’e k’iino’oba’, k’a’ayta’ab yaan u beeta’al Mur-Muros, u cha’anil pak’ bona’an tu méek’tankaajil Sotuta. Le je’ela’ jump’éel meyaj káajsa’ab tumen jyukatekoil Miguel Pech, tu’ux táan u tukulta’al u meyaj bolontúul aj-its’ato’ob -waxaktúul ti’ u noj lu’umil Méxicoi’ yéetel juntúul ti’ u lu’umil Belice- ti’al u bona’al u jejeláasil pak’o’ob le méek’tankaajo’. Cha’ane’ yaan u káajal tu k’iinil 19 tak 25 ti’ noviembre; tukulta’an u chíikbesa’al u jejeláasil kuxtal yaan tu lu’umil Yucatán.
“Tu k’iinil 25 (ti’ noviembre) leti’ kéen chúunsa’ak le meyajo’. Máaxo’ob ku boone’, juntúul yukatekoil, juntúul jbeliceil, kantúul michoacanoilo’ob, ka’atúul jmonterreyilo’ob, yéetel juntúul jguanajuatoil”, tu tsikbaltaj Paula Rechtman Bulajich, máax jo’olbesik u meyajil le cha’ana’.
En español: Sotuta tendrá su primer Festival de Murales con talento local, nacional e internacional
U tuukulil le meyaja’, jka’ansaj Pech patjo’oltej, máax táakpaja’an ti’ jejeláas cha’ano’ob ku beeta’al tu noj lu’umil México. “U tukulil le meyaja’ leti’ u tóoch’ta’al yéetel u ye’esa’al bix u bona’al pak’, tu’ux ka táakbesa’ak kaaj; beyxan ti’al u péeksa’al u yóol táankelemo’ob ti’al u kaniko’ob boon. Jka’ansaje’ tu yóotaj túun u beetik le meyaj tu kaajalo’, ts’o’okole’ teen tin wáantaj tu péekil meyaj ti’al u béeytal”, tu tsikbaltaj Rechtman Bulajich.
U cha’anil Mur-Muros, leti’e’ yáax ti’ ya’abach uláak’o’ob kun beetbil, tumen u tuukulil paach k’iine’ leti’ u páayt’anta’al uláak’ aj-its’ato’ob, ti’al u k’uchulo’ob boon tu kaajil Sotuta.
Ti’al u beeta’al cha’ane’, ma’ jts’a’ab taak’in ti’ob tumen mix máak ti’ u jo’olpóopilo’ob le kaajo’. Xdíiputada Fabiola Loeza, yéetel uláak’ mola’ayobe’, áantajnajo’ob ti’al u yantal ba’al ti’al jaantbil yéetel u jeel nu’ukulo’ob. U jaajile’, jump’éel meyaj to’on beetik u péekil ti’al u yantal.
Yáax cha’an Festival de Murales de Sotuta, yaan u káajal 25 ti’ noviembre, láas 5 u taal u chíinil k’iin, tu kúuchil Casa de la Cultura Maya Nachi Cocom. Ti’al u yojéelta’al uláak’ ba’alobe’ ku páajtal u xak’alta’al u reedes soosyalesil Boon Art.
Xak'alutskíinsa'an tumen: Sasil Sánchez Chan
