Te’e ts’ook óoxp’éel k’iino’oba’, u mola’ayil Fiscalía General del Estado de Quintana Roo tu ts’áaj ojéeltbile’ yaan kex jo’otúul ko’olel jsa’ato’ob ti’ u péetlu’umil Quintana Roo, kantúul ti’ leti’obe’ ti’ kaja’ano’ob tu noojolil le lu’u,o’. Walkila’, ts’o’ok u jóok’sa’al u ju’unil tu’ux ku ya’alal táan u kaxta’alo’ob.
Jump’éel ti’ le tu bin u k’ajóolta’ale’ leti’e’ ucha’an yéetel Elsa Yolanda Robles Soto. 15 ti’ noviembre ka’aj ts’ook ila’ab tu kaajil Cancún, ka’aj na’ak ti’ jump’éel taxi’. U kaamarasil múuch’kajtalil tu’ux kaja’ane’ ku ye’esiko’ob bix úuchik u jóok’ol tu yotoche’, ka’aj na’ak tu kis buuts’il 1862 táaka’an ichil u síindikatoil taxistas Andrés Quintana Roo.
Máax biinse’ kaxta’abij ka’aj bin Fiscalía ti’al u tsolik ba’ax úuch ka tu yilaj. Te’elo’ tu ya’alaj ti’ tu p’ataj tu’ux a’alab ti’ tumen le ko’olelo’. Ka’aj ts’o’ok u tsolike’, cha’ab u bin.
En español: QRoo: Reportan como desaparecidas a cinco mujeres en tres días
Tu noojolil péetlu’ume’, u láak’o’ob Diana Isabel López Méndez bin u beeto’ob líik’sajil t’aan tu táan u páalasioil jala’ach ti’al u k’áatiko’ob ti’ Fiscalíae’ ka u kaxtej. U ts’ook u téen ka’aj ila’abe’ leti’e’ 11 ti’ noviembre máaniko’, tu kaajil Chetumal. U kiike’ tu ya’alaje’, ts’o’ok u k’áatiko’ob ka xak’alta’al u kaamarasil le baanta tu’ux sa’ato’, ba’ale’ mixba’al a’alak ti’ob.
Beyxan k’a’ayta’ab Protocolo Alba ti’al u kaxta’al Arianna Grisel Rosales Medina, máax yaan 40 u ja’abil. Tu k’iinil 14 ti’ noviembre ka’aj ts’ook ila’ab tu kaajil Chetumal. Óoxp’éel u tatuaaje Mujer Maravilla yaan tu paach.
María de la Cruz May Manzanilla, 43 u ja’abil; u ts’ook u téen úuchik u ya’alae’ leti’e’ 15 ti’ noviembre máaniko’, tu kaajil Chetumal. Leti’e’ polok yéetel óol sak u wíinkilal, boox u tso’otsel u pool yéetel ku p’isik 1.56 metros.
Yaan xan uláak’ juntúul ko’olel ku kaxta’al. Leti’e’ Cindy Nayely Gutiérrez Vázquez, 13 u ja’abil. Sa’at tu kaajil Nicolás Bravo, tu méek’tankaajil Othón P. Blanco.
Jo’olpóopo’obe’ ku k’áatiko’ob ti’ kaaje’ wa yaan ba’ax ku yojéelta’al yóok’lalo’obe’, wa ti’ yaan máak Cancúne’, ka t’aanak 998 8817150 ext. 2130; wa Chetumal yaan máake’, t’aanak 983 83 50050 ext.1132.
Xak'alutskíinsa'an tumen: Sasil Sánchez Chan
