U 70 por siientoil ti’ u jaats bejil 5 ti’ u noj meyajil Tren Maya, ku káajal Cancún yéetel ku k’uchul tak Tulume’, yaan u ts’a’abal yóok’ol kabil ti’al ma’ u k’askúunta’al ts’ono’oto’ob yéetel áaktuno’ob yaan te’elo’, beey úuchik u ya’alik jala’ach Andrés Manuel López Obrador, tu súutukil úuchik u tse’ek ja’atskab k’iin le martes máanika’.
“U 70 por siientoil yaan u líik’sa’al ka’anal, ti’al beyo’ ma’ u máan tu’ux yaan u beel ja’ yáanal lu’um, mix ts’ono’oto’ob, chéen u 30 por siientoil kun beetbil te’e lu’umo’, ba’ale’ but’bil, ti’al beyo’ u yojéeltik máake’ ma’ táan u bin k’askúuntbil xa’ay ja’ob mix ts’ono’oto’ob”, tu ya’alaj jala’ach.
En español: El 70 por ciento del tramo 5 del Tren Maya será elevado: AMLO
Beyxan, tu k’a’ajsaje’ mina’an mix ba’al k’atik u beel le meyajo’, tumen ts’o’ok u láaj ts’aatáanta’al áamparos ts’a’aban ka’achij, ts’o’okole’ mix jump’éel u ts’a’aban tumen u yuumilo’ob le k’áaxo’obo’, wa máaxo’ob kaja’ano’ob te’e baantao’.
Yóok’lal túun u mokt’aanil meyaj yéetel Grupo México, mola’ay máax ti’ k’ubéenta’an ka’ach ka u beet le meyajo’, tu ya’alaje’ ts’oka’an u láaj ila’al ba’al yóok’lal: “ti’ leti’obe’ yaan u kueentaso’ob, ba’ale’ to’one’ yaanal ba’al k-ojel yóok’lal, ila’abe’ yaanal máak táaka’an ka’achij, le beetik túune’ je’ets’ek tumen míilitar íinjenyerko’ob beyka’aj le unaj u bo’ota’al ti’ob yóok’lal ba’ax tu beetajo’obo’”.
Tu ya’alaj xane’ yaan jump’éel tak pool ts’a’aban tumen mola’ay yóok’ol u jala’achil México, kex tumen yáax a’alab ti’e’ ts’o’okili’ u éejentiko’ob ka’ach le beyka’aj jets’a’ab unaj u bo’ota’al ti’ob ti’al u jéets’el ba’al ichilo’ob.
“Tin k’áataj ti’ séekretaroil Gobernación, ka’aj ka’a t’aanaji, ts’o’okole’ (éejenta’ab tumen Grupo México) a’alab mola’aye’ ku éejentik mokt’aan, ba’ale’ leti’e’ ku yila’alo’”, tu ya’alaj jala’ach.
Xak'alutskíinsa'an tumen: Sasil Sánchez Chan
