Ti’al u mu’uk’ankúunsa’al yéetel u táakmuk’ta’al meyaj ku beetik ko’olel te’e péetlu’umo’, u mola’ayil Secretaría de las Mujeres (Semujeres) yéetel Instituto Yucateco de Emprendedores (IYEM) tu beeto’ob kaambal xooko’ob yéetel tu k’ubajo’ob áantajo’ob ti’al u béeytal u beetik máak ba’ax ku tukultiko’ob yéetel u meyajo’ob.
María Cristina Castillo Espinosa, máax jo’olbesik u mola’ayil Semujeres, tu ya’alaje’ yéetel múul meyaj ku beeta’ale’ táan u kaxtal u béeytal u meyaj ko’olel ti’ ba’ax u k’áat. “K-ojel yaan k’iine’, tumen mina’an taak’in wa náajale’ ko’olele’ ma’ tu béeytal u luk’ul tu’ux ku loobilta’al, le beetik kaambal xook ku beeta’ale’ jach k’a’anan ti’al u ye’esa’al ba’ax bejil unaj u ch’a’ako’ob ti’al u xíimbalkunsiko’ob u mola’ayil u meyajo’ob”, tu ya’alaj.
En español: Entregan apoyos a mujeres emprendedoras en municipios de Yucatán
Leti’ xane’ tu ya’alaj Semujerese’ ts’o’ok u k’ubik 266 u p’éel áantaj ti’ ko’olel tu kaajilo’ob Progreso, Muna, Maní, Yaxcabá, Dzan, Tizimín, Chaksinkín,
Tunkás, Tahmek, Tinum, Sinanché, Oxkutzcab, Hoctún, Chankom, Tekom, Tixcacalcupul, Chikidzonot, Akil, Peto, Jo’, Saki’ Hunucmá yéetel Tixkokob.
“To’one’ k-ilik bix u k’uchulo’ob yéetel jump’éel tuukul, ba’ale’ kéen ts’o’okok u ch’a’ako’ob le xooko’, ku kaxtiko’ob u nu’ukil ba’ax ts’o’okili’ u káajsjik u patjo’oltiko’ob; kéen ts’o’okoke’ ku su’utul jump’éel mola’ay wa kúuchil koonol”, tu tsikbaltaj.
Kaambal xook ku beeta’ale’ táaka’an ichil u nu’ukbesajil Programa de Transversalidad de la Perspectiva de Género, ku taal u beeta’al tumen Instituto Nacional de las Mujeres.
Antonio González Blanco, máax jo’olbesik IYEM, tu ya’alaje’ ichil ba’ax e’esa’abe’ ti’ yaan u k’a’ananil u péek máak ti’al meyaj, u kaláanta’al u nu’uktal taak’in, koonol yéetel u je’ets’el bix kéen úuchuk le koonolo’.
Ichil meyajo’ob ku beeta’al tumen ko’olelo’obe’ ti’ yaan u beeta’al janalo’ob, nook’o’ob, chuuyo’ob, meyak che’, u tséenta’al u yik’el kaab, u beeta’al wak’ k’áan, ts’aak, ichil uláak’ ba’alo’ob.
Xak'alutskíinsa'an tumen: Sasil Sánchez Chan
