Jo’oljeak domingoe’ káaj u chíimpolta’al túumben jeets’il jts’a’abij, tu’ux ku ya’alale’ ma’ táan u páajtal u ye’esa’al u káajetiyasil chamal ti’ kúuchilo’ob koonol, ka’alikil ti’ kúuchilo’ob janale’ ma’ táan u béeytal u jáalal u yo’och máak ti’ kúuchilo’ob tu’ux jeets’el ku páajtal u ts’u’uts’al chamal. Le je’ela’ beey ts’a’abik ich Reglamento de la Ley General para el Control del Tabaco, yaan u káajal u chíimpolta’al lunes, tumen díia aabil.
Le 14 ti’ diciembre máaniko’, Ejecutivo Federale’ tu ts’áaj k’ajóoltbil, yéetel u yáantajil Secretaría de Salud, k’eexilo’ob beeta’ab te’e a’almajt’aano’, tumen yéetele’ táan u kaxta’al “u kaláanta’al kaaj, ti’al ma’ u yantal u yúuts’bentik u buuts’il chamal, ti’ mix jump’éel kúuchil, mix xan tu’ux yúul k’aalal, tu’ux ku yúuchul meyaj, ti’ tráansporte puublikóo, yéetel ti’ kúuchilo’ob tu’ux ya’ab u máan máak, je’el bix xan ti’ najilo’ob xook ti’ je’el ba’axak u jaatsil kaambal”.
En español: Restauranteros de QRoo preparan amparos contra ley antitabaco
K’eexile’ jets’a’ab ichil Diario Oficial de la Federación ts’o’okole’ ku ya’alale’, ti’al u béeytal u ko’onol chamal ti’ je’el ba’axak kúuchile’, yaan u k’a’abéetkunsa’al jump’éel tsoolts’íib, tu’ux chéen ku béeytal u chíikpajal u maarkail yéetel u tojol, ts’o’okole’ mix tu béeytal u chíikpajal mix jump’éel u yoochel wa lóogotipo.
Ba’ax jets’a’abe’ ts’o’ok u beetik u péek u yóol u múuch’kabil Asociación Nacional de Tiendas Departamentales y de Autoservicio (Antad), Alianza Nacional de Pequeños Comerciantes (Anpec), je’el bix xan Cámaras Nacionales de Comercio, Servicios y Turismo (Concanaco-Servytur) yéetel Patronal de la República Mexicana (Coparmex), tumen u ko’onol chamale’ ku beetik u náajalta’al u 25 por siientoil ti’ le taak’in ku yokol lalaj winalo’ob ti’ mejen kúuchilo’ob tu’ux ku yúuchul koonol.
Bejla’e’ ma’ tu cha’abal u ts’u’uts’a’al chamal ti’ kúuchilo’ob jeets’el u ti’al janal, mix ti’ baares, ti’al ka béeyak u beeta’ale’, máax ku ts’u’uts’ik chamale’ unaj u náachtal kex 10 metros ti’ u joolnajil le kúuchilo’, yéetel k’a’abéet u beetik táankab.
Xak'alutskíinsa'an tumen: Sasil Sánchez Chan
