Tumen ma’ táan u beeta’al ba’axt ts’a’aban ichil u ju’unil Contrato Colectivo de Trabajo (CCT), jets’a’an tumen Petróleos Mexicanos (Pemex), máaxo’ob táakano’ob ichil Sección 47 ti’ u múuch’kabil Sindicato de Trabajadores Petroleros de la República (STPRM), tu líik’saj u t’aano’ob aktáan ti’ u joolnajil u kúuchil le mola’ayo’, yaan tu bejil 33, tu’ux tu k’áatajo’obe’ ka k’u’ubuk nu’ukulo’ob najmal u yantal ti’ob ti’al u kaláantikubáajo’ob kéen jo’op’ok u meyajo’ob.
Ichil u ja’abil 2022e’, péetrolero’obe’ tu k’áatajo’ob ka beeta’ak ba’ax jets’a’an ichil u ju’unil CCT, tumen tu tak poltajo’obe’ bootasil ku k’u’ubule’ ma’ leti’e’ k’a’abéet u ts’a’abal ti’ob ti’al u beetik u meyajo’ob te’e tu pláataformail k’áak’náab tu Sondail Kaanpech, tumen ma’ tu xáantal ti’ yano’obe’ kéen k’aschajak.
En español: Carmen: Trabajadores de Pemex denuncian incumplimiento de contrato
Ajmeyajo’obe’ tu ya’alo’obe’ tumen ma’ chúuka’an u nu’ukulil u kaláantikubáajo’ob kéen meyajnako’obe’ tu jets’ajo’ob ma’ xan táan u na’akalo’ob meyaj te’e plataformao’, tumen sajbe’entsil u ti’alo’ob, beyxna ti’ u yéet meyajo’ob yéetel ti’ le kúuchil tu’ux ku beetiko’obo’. Lela’ ku yúuchul tumen ma’ tu beeta’al ba’ax jets’a’an ichil u ju’unil CCT.
“Ma’ ma’ak’olo’oni’, ba’ale’ wa to’on manik k bootáas yéetel u nu’ukulil k kaláantikbáaje’, wa ka k’uchuk úuchuk loobilaje’, wa ma’ k ts’áamaj le nu’ukulo’ob u ts’áamaj to’on le mola’ayo’, leti’e’ ku ya’alike’ ma’ táan u chíimpoltik páajtalilo’ob, ts’o’okole’ ku kúulpachtal ba’al ti’ to’on”.
Tu ya’alajo’obe’, láayli’ beyo’, kex tumen ma’ táan u na’akalo’ob te’e plataformao’ yéetel kex sáansamal ku bino’ob tu’ux ku ya’alal ti’obe’, ma’ xan táan u bo’ota’al ti’ob u bino’ob tak te’elo’, je’el bix jets’a’an unaj u beeta’al ichil CCT, “tumen to’one’ ma’ tak p’áatal te’e Islao’, ma’ tumen ma’ k k’áati’, tumen
Pemexe’ ma’ tu beetik ba’ax u ya’almaj kéen u beet ti’al u kaláantik k kuxtal”.
Tu tsolajo’obe’, kex tumen STPRMe’ ts’o’ok u k’ubik ju’un ku k’áata’al ti’al u beeta’al ba’ax jets’a’an ichil CCTe’, máaxo’ob jo’olbesik Pemexe’ ku ya’aliko’ob ts’o’ok bin u k’áata’al le nu’ukulo’obo’, je’el bix bootáas, ba’ale’ tumen mina’an u taak’inile’ ma’ táan u béeytal u ma’anal.
Xak'alutskíinsa'an tumen: Sasil Sánchez Chan
