Ti’al le ja’aabil 2023 ku yáalkaba’, tu kaajil Tulume’ yaan u yantal kex 300 túumben kúuchilo’ob beeta’an, u ya’abile’, ti’al u majáanta’al wa ti’al u ts’a’abal kúuchilo’ob koonol, beey tu ya’alaj Luis Francisco Reyna Gómez, máax túumben ts’a’aban u jo’olbes u múuch’kabil Asociación Mexicana de Profesionales Inmobiliarios (AMPI) tu baantail Tulum.
Tu tsikbaltaj walkila’ te’e kaajo’ yaan uláak’ kúuchilo’ob táan u líik’sa’alo’ob, yéetel táan u ts’aatáanta’al u séeb k’u’ubulo’ob yéetel ka ko’onoko’ob.
“Táan k a’alike’, walkila’ maanal 300 u p’éel kúuchilo’ob táan u beeta’al, yéetel táan u bin u k’ublajalo’ob.”, tu tsikbaltaj.
En español: Ofertará Tulum 300 nuevos desarrollos inmobiliarios en 2023
Ichil ba’ax jts’a’ab ojéeltbil tumen AMPI le ja’ab máaniko’, tak 2022e’ yaan 435 u p’éel meyaj ku beeta’al ti’al u líik’sa’al kúuchilo’ob tu xamanil Quintana Roo; ti’ le je’elo’obo’, 219 u p’éelale’ ti’ yano’ob tu kaajil Tulum; 127e’ tu kaajil Playa del Carmen yéetel 89 u p’éelale’ tu kaajil Cancún. U promeedyoil u tojolo’ob ti’ le yano’ob Cancúne’ kex óoxp’éel miyoon de pesos, ka’alikil Solidaridade’ kex 3.5 miyoonesil pesos yéetel Tulume’ kex 4.7 miyoonesil pesos.
Reyna Gómeze’ tu ya’alaje’ meyaj ku beeta’al ti’al u líik’sa’al kúuchilo’ob tu kaajil Tulume’ táan u k’éexel ba’al, le beetike’ táan u páa’tal ka xíimbalnak ba’al je’el bix tak walkila’, ti’al le ja’abil 2023 táan u yáalkaba’.
“Míin lalaj ja’ab jela’an ba’ax ku yúuchul tu kaajil Tulum, ts’o’okole’ to’on kmeyaj ichil u jaatsil íinmobiliaaryae’ táan k-ilik táan u k’éexel ba’al yéetel táan xan u taal túumben ba’al. Le beetike’ ktukultike’ óoli’ beey kéen úuchuk ba’al te’e ja’aba’”, tu ya’alaj.
Beyxan tu ya’alaje’ yaan u yantal u xak’altiko’ob ba’ax ku yúuchul yéetel máaxo’ob ku ts’áak taak’in ti’al u líik’sa’al le kúuchilo’ob tu kaajil Tulum, ti’al xan ka ila’ak wa yaan u yantal uláak’ túumben máako’ob kun ts’áak taak’in ti’al uláak’ meyajo’ob.
Reyna Gómeze’ tu ya’alaje’, te’e ja’abil 2023a’ yaan ya’abach ba’alob je’el u yúuchule’ ti’al ka yanak u muuk’ le jaats meyaja’. Beyxan tu ch’a’achibtaj utsil ba’ax kun taal yéetel Tren Maya, beyxan yéetel túumben áaeropuerto.
Xak'alutskíinsa'an tumen: Sasil Sánchez Chan
