Máaxo’ob ku meyaj ti’ u mola’ayil Ubere’ tu k’a’aytajo’obe’ yaan u meyajo’ob bejla’a viernes, ba’ale’ xma’ bo’olil kéen u beeto’ob. Le je’ela’ beey kun úuchula’ tumen yaan xan u táakmuk’tiko’ob “Un día sin taxi", yóok’lal le xwo’okin ba’alo’ob ts’o’ok u yúuchul yéetel ts’o’ok u beeta’al tumen u taxistasil Cancún.
Leti’obe’ ku tukultike’, péekbal táan u yantale’ ku yúuchul tumen kaaje’ ts’o’ok u náakal u yóol, yéetel ma’ táan u éejentiko’ob ba’ax ku beetiko’ob, je’el bix kéen u k’alo’ob le bejo’obo’ ti’al ma’ u máan tráansportée puublikóo, ts’o’okole’ le je’elo’ ku beetik k’aas ti’ ajmeyajo’ob, máaxo’ob chéen ku chúukpajal yaan k’iin ti’al le kamiono’, ba’ale’ kéen beeta’ak ba’al beyo’ ku yantal u ch’a’ako’ob taaxi.
“U p’áatal mix tu béeytal u ch’a’ako’ob kamione’, jach talam, tumen ku píit máan k’abo’ob, ba’ale’ u jaajile’ leti’e’ jala’ach cha’ak u yúuchul ba’al beya’; to’on túune’ yaan k táakmuk’tik ba’ax táan u péekstsiltik kaaj, ti’al ma’ u k’a’abéetkunsa’al taaxi’ ti’ jump’éel k’iin, ti’al k-áantiko’ob, ma’ ti’al k beetik k’aas ti’ le taxistaso’obo’, tumen u jaajile’ ts’o’ok u náakal u yóol kaaj”, beey tu ya’alaj Águeda Esperilla Soto, máax beetik u k’a’aytajil u ajmeyajilo’ob Uber.
En español: Cancún: Conductores de Uber se unen a ''Un día sin taxi''; darán viajes gratis
Le beetike’, te’e k’iina’ máaxo’ob ku meyaj te’e mola’aya’ yaan u “pitik” u nook’il Uber, ti’al u kéet yantal je’ex kajnáalo’obe’, tumen beyo’, yaan u béeytal u nats’ik kajnáal tak tu’ux k’a’abéet u bin, tumen leti’ le ba’ax tu tukultaj kaaj u beetiko’. Le beetike’, tu aktáanil le koocheso’obo’ yaan u ts’a’abal jump’éel ts’íib ku ya’alik #Undíasintaxi, ti’al u yila’al táakano’ob te’e péekbala’. Beyxan páayt’anta’ab tuláakal máak ti’al u táakpajal te’e ba’ax kun beetbila’, ka u biin u ju’unil u ts’áako’ob le ts’íibo’, ti’al u “na’ats’al” máak wa tu’ux.
“Ma’ táan k-k’áatik ka bo’otak kmeyaj te’e ki’iina’, kaan kbiinsik máak tak tu’ux k’a’abéet… tene’ jaaj kin meyaj Uber, ba’ale’ u kajnáalilen Cancún, le beetik xan kin wáantaj”, tu ya’alaj.
Leti’ túune’ ku tukultike’, walkila’ yaan ichil 500 yéetel 800 u koochesil ku meyaj beey Uber tu kaajil Cancún, ba’ale’ u jaajile’ ts’o’ok u yantal uláak’ túumbeno’obi’.
Xak'alutskíinsa'an tumen: Sasil Sánchez Chan
