Ti’al máaxo’ob táaka’an ichil u nu’ukbesajil ku beeta’al tumen Salud Mental tu mola’ayil Secretaría de Salud de Campeche, pak’be’en k’oja’ane’ jela’an úuchik u taal ti’ob, tumen kex ya’abach ba’al a’alab bíin úuchuk tu ja’abil 2020e’, óoli’ ma’ yanchaj mix máak tu jatsubáaj wa najo’ob tu’ux jach úuch loobilaji’, le beetik máax jo’olbesik Colegio de Sicólogos de Campeche yéetel máax ka’ach jo’olbesik u beeta’al le nu’ukbesajo’, Luis Miguel López Cuevas, tu ya’alaj walkila’, ikil jach mu’uk’an yanik reedes sosyalese’, táankelemo’obe’ ma’ táan u kaxtiko’ob ka máanak ya’abach ja’ab táan u biinsikubáajo’ob yéetel wa máax, ts’o’okole’ séeba’an u kaxtiko’ob wa máax tu yóok’lal le reedes sosyaleso’.
Tu ya’alaje’ ma’ k’oja’anil yanik ti’ máak u p’áatal laláaj súutuk tu k’a’abéetkunsik le Interneto’, mix xan k’oja’anil yanik ti’ máaki’, u jaajile’ chéen jump’éel bix u yantal máax yéetel u biinsikubáaj máak, ba’ale’ talamo’obe’ ku yantal kéen p’áatak ma’ patal u k’a’abéetkunsa’al le reedeso’, tumen yaan máaxo’obe’ ku beetiko’ob perfiles chéen ti’al u tusko’ob máak, ts’o’okole’ kéen u beeto’obe’ ku meyaj ti’ob ti’al u beetiko’ob k’aas.
Kex tumen jo’olpóopo’ob ts’o’ok u ya’aliko’ob yaan tu’ux óota’an okoltbil máak tumen ma’ patal u k’a’abéetkunsa’al pláataformasil, beyxan yaan loobilaj luba’an ichil Ley Olimpia, ba’ale’ kex beyo’ tu ya’alaj ma’ u yojéelt wa ts’o’ok u yantal wa máax ti’ ucha’an k’aas yóok’lal le ba’alo’oba’; chéen ba’axe’ unaj u ts’aatáanta’al tumen taatatsilo’ob yéetel jo’olpóopo’ob.
En español: El amor y la amistad en tiempos de redes sociales y búsqueda de relaciones exprés
Tu ya’alaje’ ku yila’al jach ya’ab u k’a’abéetkunsa’al le pláataformaso’obo’ ti’al u k’ajóolta’al uláak’ máak de jach tu jaajil, tumen yaan k’iine’ talam u k’ajóolta’al máak de yaanal kaajil, chéen ba’axe’ yéetel Internete’ lelo’ ku béeytal.
“Ya’abach ba’al kana’ab tu k’iinilo’ob táan pak’be’en k’oja’an, ts’o’okole’ bejla’e’ ma’ tu páajtal u p’ata’al tséelil le reedeso’obo’, ts’o’okole’ ma’ u k’áat u ya’al wa ma’ patali’, u ba’alile’ leti’ u sáasil t’aan máak, u ya’alik u jaajil, je’el bix u beeta’al kéen k’ajóolta’ak máak jach de jaajil”, tu ya’alaj.
Ts’o’okole’, “sáasil yanik tu k’iinilo’ob pak’be’en k’oja’ane’ le reedes sosyaleso’obo’ jach k’a’abéetkunsa’ab tumen máaxo’ob ma’ páatchaj u jóok’olo’ob tu yotocho’obi’, ti’al máaxo’ob p’áato’ob meyaj tu taanajo’ob, yéetel ti’al máaxo’ob yanchaj u ch’a’ako’ob xook ti’ Internet, tumen óoli’ ka’ap’éel ja’ab yanchaj u k’alikubáaj máak”, tu tsikbaltaj.
Kex beyo’, k’a’anan u ts’a’abal u p’iisil u k’a’abéetkunsa’al le pláataformaso’, tumen kex yaan máak u k’áat u k’ajóol uláak’ wíinike’, yaane’ u k’áat yaanal ba’al”, tu ts’ook a’alaj.
Xak'alutskíinsa'an tumen: Sasil Sánchez Chan
