U meyaj xwak’ k’áan Rosita Chan, máax síij tu kaajil Kantunilkín, ti’ u méek’tan kaajil Lázaro Cárdenas, jach chíikpaj tu ye’esajil Punto México, ku taal u beeta’al tumen u mola’ayil Secretaría de Turismo, tu noj kaajil Ciudad de México, tu’ux páayt’anta’an Quintana Roo ti’al u chíikpajal tuláakal u winalil febrero. Rosita Chane’ tu ts’áaj jump’éel táayer yóok’lal bix u beeta’al le wak’ k’áano’.
“Yéetel le e’esajilo’oba’ ku kaxta’al u chíikbesa’al meyaj ku taal u beeta’al tumen u ko’olilo’ob Quintana Roo, ti’al u náajalo’ob yéetel ba’ax ku beetiko’ob, tumen beyo’ ku yantal uláak’ ba’ax u meyajto’ob tu’ux ka u náajalt u taak’ino’ob, tumen beey jets’a’ab unaj u yúuchul ichil u nu’ukbesajil Nuevo Acuerdo por el Bienestar y Desarrollo, táan u beeta’al tumen jala’ach Mara Lezama Espinosa”, beey a’alab ti’ jump’éel k’a’aytajil beeta’ab tumen u mola’ayil jala’ach.
En español: Artesana urdidora de hamacas destaca en Punto México
Ikil táan u beeta’al u ye’esajil “Lo hecho en Quintana Roo está bien hecho”, xwak’ k’áan Rosita Chane’ tu ye’esaj bix u meyajta’al le k’áan suuk u k’a’abéetkunsa’al tu Péetlu’umil Yucatán.
U lu’umil Quintana Rooe’ páayt’anta’ab te’e winala’, ichil u ye’esajil Punto México, ti’al u chíikbesa’al ba’ax ku meyajta’al te’e lu’umo’, ba’ale’ beyxan ti’al u k’ajóollta’al xan ba’ax seen yaan ichil uláak’ u péetlu’umilo’ob México.
Punto Méxicoe’ chúunsa’ab tumen xjala’ach Mara Lezama Espinosa, tu noj kaajil Ciudad de México. E’esajile’ ku táakbesik 23 u túul ajmeyaj máako’ob ku béeytal u k’ajóolta’alo’ob tumen yaan u chíikulal ts’íib ku ya’alik: Hecho en Quintana Roo. U máakilo’obe’ ti’ u taalo’ob ti’ u kaajilo’ob Bacalar, Benito Juárez, Cozumel, Felipe Carrillo Puerto, José María Morelos, Lázaro Cárdenas, Puerto Morelos yéetel Othón P. Blanco.
Rosita Chane’ tu kanaj u meyaj jump’éel nu’ukul jach suuk u k’a’abéetkunsa’al tu Petenil Yucatán, tumen ya’abach tu’ux ku meyaj ti’ máak. Ts’o’ok u p’áatale’ tak u jeel máako’ob yaanal tu’ux u taalo’obe’ ku k’a’abéetkunsiko’ob xan, tumen jach uts u meyaj tu’ux chokoj u yooxol.
K’áano’obe’ ku yutstal u ma’anal te’e tu’ux ku beeta’al le e’esajilo’, ts’o’okole’ u ye’esajil ba’ax seen yaan tu lu’umil Quintana Roo yaan u béeytal u cha’antal tak le 28 ti’ febrero ku taala’.
Xak'alutskíinsa'an tumen: Sasil Sánchez Chan
