Ti’ páayt’aan ku beeta’ale’, ku k’áata’al ti’ ajchuk kayo’obe’ ts’o’ok u yokla’alo’ob yéetel beeta’an k’aas ti’obe’ tu Sondail Kaanpeche’, ka u beeto’ob u tak poolil; kex wa ma’ te’e ja’ab úucha’, beey úuchik u ya’alik Santiago Jiménez González, máax jo’olbesik Unión de Pescadores Ribereños del Carmen, A.C., ts’o’okole’ tu ya’alaje’ tak walkila’, tu táan Vicefiscalía General Regional de Justicia, chéen kex 20 u p’éel xaak’al káajsa’an yóok’lal le ookolo’obo’.
Tu ya’alaje’, tu ja’abil 2022e’ ila’ab ya’abchaj ookol yanchaj Sonda de Campeche, tumen ti’ ajchuk kayo’obe’ jcha’ab u motoril u cheemo’ob, u nu’ukulil u chuuko’ob yéetel tak cheemo’ob.
Leti’ túune’ tu tsikbaltaj jump’éel yóok’lal ba’ax tsikbalta’ab ti’ jump’éel múuch’tambal beeta’ab ichil máaxo’ob chíikbesik u mola’ayilo’ob kanan kaaj, yéetel Fiscalía General de Justicia en el Estado de Campeche (FGECAM), tu’ux tu yaj óoltaj u jach p’íit óolil yaan ti’ le ajchuk kayo’obo’ tumen ma’ tu beetiko’ob tak pool, ts’o’okole’ ya’abach ti’ leti’obe’ loobilta’abo’ob ba’ale’ ma’ tu ya’alajo’obi’.
En español: Pescadores ribereños de Carmen no presentan denuncia contra sus asaltantes
“Bíisefiskaal, Yadira Arcos Jiménez, tu ts’áaj ojéeltbil xaak’alo’ob ts’o’ok káajsa’al ti’al u sáasilkúunsa’al ookol beeta’ab, ba’ale’ chéen 20 u téen tak polta’ab, kex tumen le beyka’aj ookol beeta’ab tu ja’abil 2022e’, jmáan ti’ le beyka’ajo’”, tu ya’alaj.
Beey túuno’, tu ya’alaje’ u ma’ yojel ba’axten ajchuk kayo’ob ma’ tu beetiko’ob tak pooli’, “míin tumen ku yoksa’al saajkil ti’ob, wa tumen ma’ tu yilko’ob wa yaan ba’ax ku meyajta’al yóok’lali’, mix xan ku chíikpajal wa ba’ax ti’ la xaak’al ku beeta’alo’, u jaajile’ ma’ in wjel ba’axteni’”.
Tu tsolaj xane’, jo’olpóopo’obe’ táan u páayt’antik ajchuk kayo’ob, ti’al u beetiko’ob tak pool, kex tumen wa tu ja’abil 2022 okolta’aboo’ob, ti’al beyo’ u yila’al wa je’el u su’utul ti’ob ba’ax jch’a’abij.
Jiménez González tu ya’alaje’ k’a’anan beeta’an le tak poolo’ ti’al u béeytal u beeta’al u xaak’alil. “Ts’o’okole’, kéen beeta’ak u tak poolile’, ma’ unaj u p’ata’ali’, tumen k’a’abéet xan mantats’ táan u k’áatiko’ob bix u bin, ti’al u jach yila’al u sáasilkúunsa’al ba’ax úuchij yéetel bix úuchik le ookolo’”.
Tu ts’ooke’, tu tsikbaltaje’, yaan u beeta’al uláak’ múuch’tambal yéetel jo’olpóopo’ob, tumen láayli’ yaan u k’iinil u beta’al le tak poolo’obo’, ba’ale’ k’a’abéet u beeta’al.
Xak'alutskíinsa'an tumen: Sasil Sánchez Chan
