Úuchik u máan U K’iinil U Chíimpolta’al Yáax T’aan ku Kanik Wíinik tu kuxtale’, u mola’ayil Instituto Estatal de Transparencia, Acceso a la Información Pública y Protección de Datos Personales, (Inaip Yucatán) yéetel Instituto Nacional de Transparencia, Acceso a la Información y Protección de Datos Personales (INAI) tu ts’áajo’ob k’ajóotbil u tsoolil ju’un k’aaba’inta’an ich káastelan beey Guías de protección de datos personales en lenguas originarias de los pueblos de México.
Máax p’ata’an beey kóomisyonadae’ María Gilda Segovia Chab tu ya’alaje’, u ts’a’abal k’ajóoltbil jump’éel ju’un je’el bix le Guíao’, ku ts’a’abal u páajtalil máasewal kaajo’ob u yojéelto’ob bix najmal u k’a’abéetkunsik u páajtalilo’ob ti’ ba’ax yaan u yil yéetel u kaláanta’al u ba’alumbáaj wíinik, ba’ale’ meyaje’ k’a’anan tumen ku chíikbesik xan máasewal t’aano’ob, ti’al beyo’ u yantal ti’ kaaj ba’ax k’a’abéet ti’, ichil u t’aan.
“Kéen ila’ak ich maaya ts’íibta’ane’, ku chíikpajal xan le kaajo’, tumen ku táakmuk’tik t’aan. Walkila’, táan u ka’a’ ts’a’abal to’on k kúuchil, maaya t’aane’ ku yu’uba’al ti’ k’aay tuukulo’ob, tsikbalo’ob, k’aayo’ob, beyxan ju’uno’ob yéetel le ku ts’áak u páajtalil ti’ ko’olel yéetel xiib u kanik ba’alo’ob yóok’al u páajtalilo’ob”.
En español: Inaip Yucatán e INAI presentan guía de protección de datos personales en lenguas maternas
Beyxan leti’e’ tu ya’alaj u k’a’ananil u beeta’al meyajo’ob je’el bix le je’elo’ tumen Inaip Yucatán tumen u yutsile’ ti’al máaxo’ob t’anik maayai’; leti’obe’ ku beetiko’ob meyajo’ob, je’el bix Inaip en tu municipio; u nu’ukbesajil raadyóo U t’aan sáaskunaj meyaj, yéetel ku béeytal xan u ts’atáanta’al kaaj ich maaya t’aan.
Beey túuno’, u Komisionadail INAI, Josefina Román Vergara, tu ya’alaje’ ti’al u suta’al le guiao’ yanchaj u mu’uch’ul jeleáas ba’alo’ob yéetel meyajo’ob, ichil máaxo’ob t’anik náhuatl, zapoteco, mixteca, tzeltal, tsotsil yéetel maya.
Leti’e’ tu tsukbaltaje’, ichil tuláakal u noj lu’umil Méxicoe’ yaan maanal 7 miyoonesil máaxo’ob t’anik jump’éel ti’ le 68 u p’éel máasewal t’aano’ob yaan; tu lu’umil Chiapas, Oaxaca yéetel Yucatán yaan u ya’abil máaxo’ob t’anik; le beetike’, je’el bix jets’a’anil ichil Ley General de Protección de Datos
Personales en Posesión de Sujetos Obligados, ku kaxta’al u jóok’sa’al uláak’ ts’íibo’ob je’el bix le Guía jts’a’ab k’ajóoltbilo’.
Te’e súutuko’, táakpaj u jo’olpóopil Izamal, Warnel May Escobar, máax k’am u jeel máaxo’ob táakpajo’obi’, máax ki’mak óolt u beeta’al le Guíao’. Beyxan ti’ yanchaj u jo’olpóopilo’ob Xanabá, Kimbilá, Sitilpech, Citilcum yéetel Pixilá, je’el bix xan kajnáalo’ob.
Xak'alutskíinsa'an tumen: Sasil Sánchez Chan
