U mola’ayil Abogadas Mx tu beetaj le lunes 17 ti’ febrero máanika’, u jaats meyaj tu kaajil Jo’, tu’ux táan u kaxta’al u ma’alobkúunsa’al meyaj ku beeta’al ti’ leeyées tu lu’umil Yucatán, ikil u kaniko’ob uláak’ ba’alo’ob yéetel ikil u béeytal u múul meyaj máaxo’ob u yojelo’ob ba’al yóok’lal le je’ela’.
Te’e yáax jaats meyaja’, tu beetajo’ob kaambal xook yéetel áabogadas, yóok’lal ba’alob yaan ba’al u yil yéetel u péech’óolta’al máak tu meyaj. Káaj u xak’alta’al bix u yúuchul kéen k’a’aytak u kaxta’al u yuumil meyaj tak kéen xu’uluk meyaj ichil mola’ay yéetel le wíiniko’.
Tak walkila’ táakpaj 21 u túul x-áabogadáas, tu lu’umil Yucatán, ba’ale’ u múuch’kabil Abogadas Mx ts’o’ok waxakp’éel ja’abo’ob káajak u meyaj tu lu’umil México ti’al u ka’ansa’al jejeláas ba’alob yaan ba’al u yil yéetel maarkáas, kóontaktos, ichil uláak’ ba’alo’ob. Yaan xan uláak’ táan u meyajo’ob Puebla yéetel Monterrey.
“Kti’ale’, u káajal meyaj tu lu’umil Yucatáne’ jach k’a’anan tumen beyo’, ku béeytal u kaxta’al bix je’el u yúuchul áantaj yéetel múul meyaj”, tu tsikbaltaj María Teresa Paillés, máax jo’olbesik Abogadas Mx.
En español: Abogadas Mx presenta capítulo en Mérida, el primero de la península
“Walkila’ ts’o’ok u ya’abtal ko’olel ku kanik u beet u áabogadail. Wa ku ya’abtal ko’olel ti’ kúuchilo’ob tu’ux k’a’anan u je’ets’el ba’alo’obe’, ku káajal xan u jáawal tuus meyaj yaan ti’ mola’ayo’ob wa ti’ jala’ach”, tu tsikbaltaj Antonia Rodríguez, máax beetik u díirektorail le múuch'kabilo'.
Beyxa, tu ya’alaje’, jump’éel ti’ le meyajo’ob ku beeta’al tumen múuch’kabile’, leti’ u je’ets’el jach ba’ax najmal u yantal ti’al u yantal ba’al k’aaba’inta’an beey inclusión yéetel diversidad ichil despaachóos yaan tu lu’umil México, ti’al beyo’, u béeytal u no’ojanchajal meyaj ku beetik x-áabogadaso’ob.
Ichil u múuch’kabil Abogadas Mx yaan jump’él u nu’ukbesajil beekáas ti’al u yáantal máak xook yéetel kaambal ti’ posgraadóo, ku ts’áako’ob xan u xookil inglés yéetel yaan xan méembresyas xma’ bo’olili’.
U jaats meyajil Jo’e’ yaan u jo’olbesa’al tumen Wendy Salgado, yéetel yaan xan u táakbesa’al x-éembajadoras Lorena Marrufo, Karen Caro yéetel Diana Jimenez.
Beey túuno’, áabogadas bíin u yóot táakpajal te’e reeda’, je’el u páajtal u yokol u xak’alto’ob u lúuchil Internet wa u túuxta’al ts’íib ti’ [email protected].
Xak'alutskíinsa'an tumen: Sasil Sánchez Chan
