Walkila’ ts’o’ok u ts’a’abal u pak’pachil kúuchilo’ob je’ex móonumentóos yéetel tu’ux ku yúuchul koonol yóok’lal xíimbalil líik’saj t’aan ku beeta’al tu K’iinil Ko’olel, ts’o’okole’ yaan u ts’a’abal meyaj 3 mil xkanan kaajo’ob, ti’al u kaláanta’al máaxo’ob kun táakpajali’.
Máax beetik u séekretaroil Gobierno, Martí Batres, tu k’a’aytaje’ yaan u beeta’al jump’éel óoperatibóo tu’ux ka jach ila’ak u kaláanta’al tu beel le ba’ax kun beetbilo’, ts’o’okole’ beetaj páayt’aan ti’al u beetiko’ob líik’saj t’aan, ba’ale’ ich jets’ óolal.
“Yaan k’iine’, yaan mejen múuch’il máako’ob ku yoksikubáajo’ob te’e líik’saj t’aano’obo’, ba’ale’ chéen xwo’okin u ka’ajo’ob, le beetike’ yaan kjach ts’áak k-óol ti’al kaláantik ma’ u yúuchul, ti’al u máan tuláakal ich jets’ óolal”, tu tsikbaltaj.
Tu ya’alaje’ yaan túun u yantal múul meyaj yéetel Comisión de Derechos Humanos ti’ u kaajil Ciudad de México, ti’al beyo’ u yúuchul múul kananil yéetel xkanan kaajo’ob kun ts’áak chaleekóos chak k’aank’an u boonil, ts’o’okole’ tu much k’áataj “ma’ u biinsa’al nu’ukulo’ob ti’al p’uuch, baj, ichil uláak’o’ob”.
Beey túuno’, u mola’ayil Secretaría de Seguridad Ciudadana yaan u ts¡áak meyaj kex 3 miil kanan kaajo’ob, u ya’abile’ ko’olel, ti’al u kaláanta’al yéetel u ts’aatáanta’al xíimbalil líik’saj t’aan kun káajal Ángel de la Independencia, Monumento a la Revolución yéetel tu’ux yaan ka’ach u glorietail Colón, ichil uláak’ tu’uxoo’ob.
Kanan kaajo’obe’ chéen yaan u búukintik u kaaskóos, u pix píixo’ob, u paano’ob, yéetel chéen wa ka k’a’abéetchajake’ yaan u meyaj ti’ob éextintoorées.
Ka’alikil túune’, u yúumil kúuchilo’ob tu’ux k uyúuchul koonole’ tu ts’áaj u piixil le kúuchiulo’obo’ ti’al u kaláantiko’ob ma’ u k’askúunsa’al, je’el bix ucha’an ti’ uláak’ ja’abo’ob, tumen beyo’ ku béeytal u kaláanta’al máaxo’ob yano’ob te’elo’.
En español: Tres mil policías custodiarán las marchas por el Día de la Mujer en CDMX
Xak'alutskíinsa'an tumen: Sasil Sánchez Chan
