Te’e k’iino’oba’ yaan u beeta’al tsikbalo’ob yéetel ajts’íibo’ob, tse’eko’ob, kaambalo’ob, ichil uláak’ ba’alo’ob, ikil táan u jo’otéenil u beeta’al Encuentro de Promotores de Lectura, tu’ux táan u táakpajal máaxo’ob ku meyajo’ob ti’al u péektsiltiko’ob xook.
Jo’oljeak 13 yéetel bejla’a 14 ti’ febreroe’, Fundación SM yéetel Feria Internacional de la Lectura Yucatán 2023 (FILEY) táan u múul meyajo’ob ti’al u béeytal le múuch’tambala’, tu’ux ku kaxta’al u péeksa’al u yóol máak ti’al le xooko’.
Tu súutukil úuchik u chúunsa’al meyaje’, máax jo’olbesik Fundación SM, Cecilia Espinosa Bonilla, tu ya’alaje’, yéetel meyaje’ táan u kaxta’al u tsikbalta’al ba’ax ku yúuchul ti’ le k’iino’oba’, tu’ux táanil yaan séelular yéetel áaplikasyones, le beetike’ k’áatchibta’ab: bix u kaxta’al u le’ep’el u yóol máak ti’al xook.
En español: Promotores proponen una rebelión de los lectores en la Filey 2023
“To’one’ taak k-kaxtik uláak’ bejo’ob ti’al k-e’esik beyka’aj u muuk’il le t’aano’, le beetike’, wey yano’ob ti’ le múuch’tambala’, ti’al ktáakmuk’tik meyaj ku beeta’al tumen máaxo’ob péektsiltik xook”, tu ya’alaj.
Beey túuno’, tu súutukil u t’aan máax jo’olbesik Encuentro, Nubia Macías Navarro, tu ya’alaje’ te’e ja’aba’, táan u táakpajalo’ob ajts’íibo’ob Verónica Murguía, Hernán Bravo Varela, Yásnaya Elena Aguilar yéetel Emilio Lome.
Beyxan, yaan u táakpajal Carmen Boullosa, máax chíimpolta’ab yéetel Premio Excelencia en las Letras “José Emilio Pacheco” 2023 yéetel Ricardo Zárate, jts’íib yéetel máax chíimpolta’ab yéetel Gran Angular 2022.
Uláak’ máax kun táakpajale’, leti’e’ jmaaya ts’íib Ángel Augusto Uicab, máax yaan u tsikbaltik jejeláas ba’alo’bo yóok’lal k’aay tuukul; ka’alikil xyukatekail ts’íib Margarita Robleda yaan u beetik u táayeril “Los libros no muerden”.
Tu ts’ooke’, máax jo’olbesik Universidad Autónoma de Yucatán (UADY), Carlos Alberto Estrada Pinto, tu ya’alaje’ le múuch’tambala’ k’a’anan yéetel kaláanta’ak ka u táamuk’t tuláakal ba’ax ku péektsiltik FILEY.
Xak'alutskíinsa'an tumen: Sasil Sánchez Chan
