Maaya xoknáal Carolina Cocom Dzip, táaka’an ichil u múuch’il U Muuk’ iik’, ti’ u téesekundaaryail Juana de Asbaje, tu kaajil Ekpedz, Tixcacalcupul, jach ki’imak u yóol tumen u najil xooke’ tu náajaltaj u chíimpolalil Equipo Revelación, ichil u keetil FIRST LEGO Leagues México 2023, beeta’ab tu noj kaajil Ciudad de México, ba’ale’ beyxan tumen úuchik u k’uchul tak te’elo’ béeychaj u k’ajóoltik k’áak’náab yéetel jáal ja’, mix juntéen u yil ka’achij, mix xan jach náachchaja’an ka’ach ti’ u kaajali’.
Le 6 ti’ marzo máaniko’, maaya paalale’ béeychaj u k’uchulo’ob tu yáax keetil beeta’ab tu noj najil xook Universidad Modelo, ti’ u kaajil Jo’.
Ba’ale’ te’e noj keetil táant u beeta’al Ciudad de Méxicoe’ tu jach péeks u yóol le jueeso’obo’, tumen meyaj ku péektsiltiko’ob ku kaxtik u ch’a’ak u muuk’ iik’ ti’al u ts’a’abal u sáasil u kaajalo’ob.
En español: Niños mayas ganan Equipo Revelación en competencia de robótica de LEGO
Xoknáalo’ob táakano’ob ich U Muuk’ Iik’e’ tu beto’ob jump’éel xaak’al ti’al u yojéeltiko’ob ba’ax talamil yaan tu kaajalo’obi’, le beetik jets’a’ab unaj u ch’a’anukta’al u k’ujsa’al ja’ ti’ kaaj yéetel u ts’a’abal sáasili’; yéetel u yáantajil legos, beyxan yéetel ba’ax ts’o’ok u kaniko’ob yóok’lal robootikae’ tu beeto’ob jump’éel makeeta tu’ux tu ts’áajo’ob najo’ob yaan tu kaajalo’ob, ba’ale’ sáasil yéetel ja’e’ k’ujsa’an yéetel u muuk’ iik’.
Carolina Cocom, xoknáal táakpaje’, tu ya’alaje’ “yéetel le meyaja’, jala’acho’obe’ ku páajtal u ts’aatáantik le talamilo’ob yaan tu kaajalo’obi’, tumen mina’an uk’be’en ja’ mix sáasili’.
Rolando Wilberto Coral Martín, leti’e’ máax ka’ansik le múuch’il paalalo’oba’ tu ya’alaje’, walkila’ ma’ ts’a’abak k’ajóoltbil u réesultadosil le keetila’, le beetike’ ma’ u yojelo’ob wa yaan u máano’ob ti’ le uláak’ keetilo’, tukulta’an u beeta’al ti’ kaajo’ob je’ex Marruecos, San Diego, ichil uláak’o’ob.
Le sábado máanika’, k’uba’ab jayp’éel chíimpolalo’ob, tu’ux jts’a’ab Equipo Revelación. Tuláakal máax ku táakpajale’ ki’imak u yóol, tumen yáax juntéen u táakpajalo’ob ti’ jump’éel keetil je’ex le je’elo’, ts’o’okole’ yaan ba’ax ts’o’ok u náajaltioko’ob.
U jala’achil u lu’umil Yucatán, Mauricio Vila Dosal, tu ki’imak óoltaj paalalo’ob táakpaj te’e keetilo’.
Xak'alutskíinsa'an tumen: Sasil Sánchez Chan
