Walkila’, yéetel le beyka’aj máak ts’o’ok u kóojol te’e péetlu’umo’ yóok’lal u k’iinilo’ob Semana Santae’, ila’ab ts’o’ok u k’a’abéetkunsa’al kex u 85 por siientoil otelo’ob yaan tu xamanil le péetlu’umo’. Ichil tsoolts’íib ku jóok’sa’al sáansamal tumen u múuch’kabil Asociación de Hoteles de Cancún, Puerto Morelos & Isla Mujeres, chíikpaj tu kaajil Cancúne’ k’a’abéetkunsa’an u 85.4 por siientoil; Puerto Morelos meyajnaja’an u 75.7 por siientoil yéetel Isla Mujeres maanal ti’ 86.9 por siientoil.
Ka’alikile’, tu kúuchil Aeropuerto Internacional de Cancún xoka’an sáansamale’ yaan kex 580 u p’éel óoperasyono’ob. Ti’ le ts’ook semanaso’obo’, ila’ane’ jach tu beel u jáayal yéetel u líik’il abyono’ob, le beetik xane’ chíikpaj ka’anchaj 16.9 por siientoil le beyka’aj máak ku k’a’abéetkunsik le je’ela’ ti’al u winalil marzo. Ts’o’okole’ wa ku ke’etel yéetel láayli’ te’e k’iino’oba’ ba’ale’ tu ja’abil 2022e’, ya’abchaji tumen chéen yanchaj 784 mil 985 u p’éel óoperasyoono’ob, ba’ale’ te’e ja’aba’ yanchaj 917 mil 858 u p’éelal. Le je’ela’ ku ye’esik ka’anchaj ti’ jump’éel ja’abe’, 24.75 ti’ le beyka’aj máax máan ti’ péepen k’áak’.
En español: Ocupación hotelera en la zona norte de Quintana Roo alcanzó 85%
Ichil tsoolts’íib jóok’sa’ab tumen Grupo Aeroportuario del Sureste, máax ku meyaj México, Estados Unidos yéetel Colombia, tu winalil marzo ti’ u ja’abil 2023e’ xoka’an 6.1 miyonesil páasajeros, ts’o’okole’ le je’ela’ tu chíikbesaj ka’anchaj 6.7 por siientoil keetel yéetel le yanchaj marzo ti’ u ja’abil 2022.
“Ya’abchaj máaxo’ob k’a’abéetkunsik péepen k’áak’ tu lu’umil México 11.8 por siientoil; 9.3 por siientoil tu lu’umil Puerto Rico, yéetel Colombiae’ éem 9.1 por siientoil. U ya’abtal páasajeros México yéetel Puerto Ricoe’ ya’abkunsa’ab u ya’abil tumen domeestikóo jaatsil 20.1 por siientoil yéetel 6.4 por siientoil, beyxan íinternasyonaal traafikoe’ ka’anchaj 6.2 por siientoil yéetel 47.9 por siientoil”, a’alab tumen Asur.
Beey túuno’, otelo’obe’ táan u páa’tiko’ob ka jach chu’upuk kúuchilo’ob te’e k’iino’ob ku taala’, tumen yaan uláak’ máako’ob kun k’uchulo’ob chéen ti’ káarreteráa.
Xak'alutskíinsa'an tumen: Sasil Sánchez Chan
