Tu jo’oloj ka’ap’éel p’isk’iinil je’elek 529 mil 841 u túul u xookil paalalo’ob Educación Básica yéetel Media Superior ichil tuláakal u péetlu’umil Yucatáne’, bejla’a lunes u suuto’ob xook, ti’al beyo’ u ts’o’oksiko’ob u yalabil kaambal p’aatal ti’ le ja’abil xooka’ 2022-2023.
Bejla’a’ 17 ti’ abrila’, paalal yéetel táankelemo’obe’ yaan u ch’a’ajoltiko’ob xook. U tuukulile’, le ja’abil kaambala’ yaan u ts’o’okol tu k’iinil 18 ti’ julio ti’al xoknáalo’ob, yéetel tu k’iinil 20e’ kun ts’o’okol ti’al ajka’ansajo’ob.
U meyajnáalil u mola’ayil Educación ti’ U Jala’achil u Lu’umil Yucatán, Liborio Vidal Aguilar, tu k’a’aytaje’, j-je’el 432 mil 57 paalalo’ob ti’ u jaats xookil íinisyal, preeskolaar, primaarya yéetel séekundaryaa; yéetel uláak’ 97 mil 784 u xoknáalilo’ob báachiyeratóo. Ma’ yanchaj xook ichil u k’iinil 3 tak 14 ti’ abril, je’el bix jets’a’anil tu tsolk’iinil le xooko’.
En español: Más de 529 mil alumnos regresarán a clases este lunes en Yucatán
Beyxan Vidal Aguilare’ tu ts’áaj u níib óolalil ti’ taatatsilo’ob tumen jach táan u yáantajo’ob ikil táan u ch’a’ajolta’al xook, tu jo’oloj máanak le pak’be’en k’oja’ano’, le beetik láayli’ u béeytal le kaambalo’.
Uláak’ ba’ax tu chíimpoltaje’, leti’e’ meyaj ku beeta’al tumen ajka’ansajo’ob, tumen ku ts’áak u yóolo’ob yéetel ku jach péeko’ob ti’al u béeytal u yúuchul le xooko’, ti’al u yutsil paalal yéetel táankelemo’ob yaan tu lu’umil Yucatán.
Beey túuno’, kex táan u ch’a’ajolta’al le xooko’, láayli’ yaan uláak’ k’iino’ob tu’ux ma’ tun yantal xooki’. Le je’elo’obo’ leti’ lelo’oba’: u yáax k’iinil mayo, U K’iinil Meyaj; 5 ti’ mayo, U K’iinil U Ba’ateltáambalil Puebla; 15 ti’ mayo, U K’iinil Ajka’ansaj.
Yaan xan u yantal ka’ap’éel viernes tu’ux mina’an xook ti’ le paalalo’obo’, ma’ili’ ts’o’okok u ja’abil xook, tu winalil julio. Le je’elo’oba’ leti’e’ 26 ti’ mayo yéetel 30 ti’ junio, tumen ajka’ansajo’obe’ yaan u yantal u meyajtiko’ob Consejo Técnico yéetel u kaambalil Taller Intensivo de Formación Continua para Docentes. Nuevos Planes y Programas de Estudios.
Xak'alutskíinsa'an tumen: Sasil Sánchez Chan
