U mola’ayil Secretaría de la Cultura y las Artes (Sedeculta), ikil táan u meyaj Dirección de Museos y Patrimonio beyxan Red de Museos de Yucatán (Redmy) tu meyajtaj jayp’éel e’esajilo’ob ti’al u béeytal u cha’antalo’ob dée áak’ab, tu lu’umil Yucatán.
Bolonp’éel u kúuchilo’ob e’esajil kun je’ik u joolnajilo’ob tial u xíimbalta’al dée áak’ab; u tuukulile’, ka béeyak u kóojol máak láas 7 áak’ab, yéetel yaan u xáantal jump’éel ooráa. Le je’ela’ yaan u beeta’al tu yóoxp’éel mieerkolesil ti’ lalaj winal, yéetel tukulta’an u ts’o’okol tak diciembre.
Yáax e’esajile’, beeta’ab tu kúuchil Museo de Historia Natural, ti’alinta’an tumen Ayuntamiento de Mérida, yéetel chéen k’ama’ab 60 u túul máaki’.
U yokol máak te’e kúuchilo’ob ti’al cha’ane’, xma’ bo’olil, chéen ba’axe’ k’a’abéet u ts’íibtik u k’aaba’ ti’al u bin, le beetike’ unaj u túuxtik u ts’íib te’ela’ [email protected].
Ti’al u winalil mayoe’, jets’a’an cha’an ti’al u k’iinil 17, tu kúuchil Museo Regional de Antropología “Palacio Cantón”; 21 ti’ junioe’ Interactivoil kúuchil Palacio de la Música; tu k’iinil 19 ti’ julioe’ ti’ kun beetbil Arte Contemporáneo Ateneo de Yucatán (Macay); ti’al 16 ti’ agostoe’, tu kúuchil e’esajil Arte Popular de Yucatán (MAPY); 20 ti’ septiembree’ tu kúuchil Casa Montejo; ti’ 18 ti’ octubree’, tu’ux yaan u kúuchil Ciencias del Cráter Chicxulub; 15 ti’ noviembree’, ti’ le ku k’aaba’tik Canción Yucateca, yéetel ti’al u k’a’alal ja’abe’, tu k’iinil 20 ti’ diciembree’, ti’ kun beetbil Mundo Maya dw Mérida (GMMMM).
Xak'alutskíinsa'an tumen: Sasil Sánchez Chan
