Áanalte’ob ts’íibta’an ich ka’ap’éel t’aan ti’al mejen paalal, yéetel ts’a’aban u boonile’, k’a’anan ti’al u kanik máak uláak’ jump’éel t’aan. Le beetike’ u mola’ayil BookBankUSA/BBU Publishing, ku jach meyaj ti’al u jóok’sik áanalte’ob je’el bix le je’elo’; walkila’ táant u ts’a’abal k’ajóoltbil Tita y los colores del amor, ts’íibta’an tumen C.V. Monterrubio, yéetel u boonilo’ob Natalia Gurovich.
Lela’ jump’éel tsikbal ti’al mejen paalal, beeta’an ich ka’ap’éel t’aan, yéetel le ku péektsilta’al ka béeyak u tsikbalta’al ba’ax ku yu’ubik máak tu puksi’ik’al. Te’e tsikbalo’, ku chíikpajal Tita yéetel u chan áabil Molo, ku núukiko’ob u k’áatchi’il: yaan wáaj u jejeláasil yaabilaj.
Beey túuno’, áanaltee’, ku chíikbesik boono’ob yéetel ts’íib ich ka’ap’éel t’aan -jump’éel ti’ kaadáa tséelik- paalale’ ku kanik u ya’al jump’éelili’ ba’ax ku yu’ubik, ba’ale’ ich ka’ap’éel t’aan.
Ti’ jump’éel tsikbal beeta’ab yéetel C.V. Monterrubio, tu ya’alaje’, ichil ts’íib ku beeta’al ti’al mejen paalale’, ma’ unaj u p’áatal mina’an “jump’éel chan i’inaj ti’al u yaajsa’al u tuukulo’ob. Ti’ mejen paalale’ láayli’ yaan ya’abach lu’um ti’al u pa’ak’al jejeláas ba’al tu tuukul, ti’al u páatjo’olta’al ba’al, tumen táan u bin u k’ajóoltiko’ob yóok’ol kaab”.
U péektsilta’al xook, yéetel u beeta’al uláak’ ba’alo’ob ti’al u yantal u na’at mejen paalale’ tu ts’áaj u yóol Monterrubio ti’al u ts’íibtik tsikbalo’ob. “Kin meyaj ti’al in we’esik ti’ in ts’íibe’, le jejeláas no’ojan ba’alo’ob unaj u kanik paalal, ti’al xan u béeytal u kaambalo’ob yéetel”.
Monterrubioe’ tu tsikbaltaj áanaltee’ tu ts’íitbaj ka’alikil u tuklik ka’ach aanimáas u chiich. “Ti’al in wa’alik yaabilaj kin wu’uyik tu yóok’lal, ti’al beyo’ in tsolik bix u jejeláasil u yu’ubik máak yaabilaj”.
Tu tsikbaltaj xane’, áanaltee’ ku yáantajo’ob, tumen jun jaats ti’ le tojol kun náajaltbil kéen konchajake’ yaan u k’a’abéetkunsa’al ti’al u tséenta’al u kúuchilo’ob áanalte’ob Estados Unidos yéetel uláak’ noj lu’umo’ob.
Xak'alutskíinsa'an tumen: Sasil Sánchez Chan
