Ti’al u péektsilta’al, u mu’uk’ankúunsa’al yéetel u kaláanta’al t’aano’ob sajbe’entsil yanik u ch’éejelo’ob tu noj lu’umil Méxicoe’ k’a’ayta’ab u payalt’aanil Artes Verbales 2023, ti’al beyo’ u yoksa’al tuukul meyajo’ob je’el u yutstal u beeta’al ti’al u táakmuk’ta’al t’aan, káan iik’ ti’ilil wa its’at ku beeta’al ich máasewal t’aano’ob.
Walkila’, t’aano’ob ts’o’ok u p’íittal máaxo’ob t’anike’ k’ucha’an tak 107 u p’éel u jejeláasil, le beetike’ táan u kaxta’al máaxo’ob t’anik yéetle máaxo’ob jach u yojelo’ob ya’abach ba’al yóok’lalo’ob, ti’al u beeta’al le meyajo’oba’.
U mola’ayil Secretaría de Cultura federal, ikil u meyaj yéetel Sistema de Apoyos a la Creación y Proyectos Culturales (SACPC), ti’ múul meyaj yéetel Instituto Nacional de Lenguas Indígenas (Inali), táan u kaxtik máaxo’ob ts’íibtik jejeláas tsikbalo’ob wa u ya’abach ba’al yóok’lal u kuxtal k’a’anan máako’ob ku t’aniko’ob t’aan sajbe’entsil yanik u ch’éejelo’ob, ti’al beyo’ u molts’íibta’al u k’ajla’ayil le kaajo’ob je’elo’, yéetel ba’ax yaan u yil yéetel u lu’umilo’ob, u ch’i’ibal u máakilo’ob, u kajnáalilo’ob wa u kaajil, u k’aaba’ob u kaajilo’ob yéetel je’el ba’axak bíin u chíikbes u yóol le kaajo’obo’, je’el bix na’ato’ob, tsikbalo’ob, k’aayo’ob, báaxalo’ob, ichil uláak’ ba’alo’ob.
Ti’al u táakbesa’al meyajo’obe’, k’a’abéet u ts’íibtik u k’aaba’ máak te’e kúuchil Interneto’, yéetel u ts’ook k’iinil ti’al u beeta’ale’, leti’e’ 16 ti’ junio ku taala’. Tukulta’ane’ yaan u yéeta’al 23 u p’éel meyajo’ob, yéetel yaan u k’u’ubul 100 mil pesos ti’ lalaj jump’’éel ti’al u béeytal u beeta’alo’ob.
Ti’al u yojéelta’al uláak’ ba’alo’obe’ ku páajtal u xajk’alta’al foncaenlinea.cultura.gob.mx, je’el bix xan www.inali.gob.mx.
Xak'alutskíinsa'an tumen: Sasil Sánchez Chan
