Junmúuch’ ajxak’al xooko’obe’tu kaxto’ob u pe'echak’ wíinik, u asab úuhbenil kaxta’an Alemaniae’, tu baantail Baja Sajonia. Máaxo’ob kaxte’ ti’ ku meyajo’ob tu noj najil xook Universidad de Tubinga yéetel Centro Senckenberg para la Evolución Humana y el Paleoambiente, ts’o’okole’ ba’ax kaxta’ab ti’ xaak’al beeta’abe’ jts’a’ab k’ajóoltbil ti’ jump’éel ts’íib tu pikil ju’unil Quaternary Science Review.
En español: Encuentran huellas humanas de hace 300 mil años en Alemania
Pe’echak’o’obe’, maanal 300 mil ja’abo’ob u yúuchbenil, ti’ yano’ob ka’ach tu úuchben paleoliitikóo kúuchil Schöningen, tu baantail Baja Sajonia, ts’o’okole’ ku tukulta’ale’ p’ata’ab tumen juntúul máak táaka’an ka’ach ichil u chan baatsil Homo heidelbergensis.
Ajxak’al xooko’obe’ ku tukultiko’obe’ te’e baantao’ naats’ yanik ka’ach jump’éel aak’al, tu’ux ku yantal ja’ ti’al u yu’uk’ul yéetel u yichkíil ba’alche’ob yéetel wíiniko’ob; láayli’ te’e baantao’ kaxta’ab xan u pe’echak’ éelefantees, ti’ u jejeláasil Palaeoloxodon antiquus, je’el bix xan u pe’echak’ ríinoseerontes Stephanorhinus kirchbergensis.
Xak'alutskíinsa'an tumen: Sasil Sánchez Chan
