Xnat’ t’íinchak balak’ ooke’ tu k’a’ayto’ob u yáax keetil u t’íinchak balak’ ookil móontanyáa (MTB, ku taal ti’ u inglés t’aanil Mountain Bike); ti’al u winalil octubre ku taala’, tu noj kaajil Jo’, le beetike’ táan u páa’ta’al ka yanak ko’olel ka káajak u líik’sikubáaj ti’al u táakpajalo’ob te’e keetila’, tumen u tuukulil u beeta’ale’, leti’ u yu’ubik ko’olel mina’an sajbe’etsil kéen okok ti’ ba’alo’ob beya’.
Milú Sauri, máax patjo’olt u múuch’oil Rudas —u siiklistaasil ruutae’—, tu k’a’aytaj le je’ela’ leti’ u yáax keetil ku beeta’al chéen u ti’al ko’olel ichil MTB tu noj kaajil Jo’, yéetel béeychaj u yantal úuchik u múul meyaj yéetel Ana Claudia Lucena, juntúul ti’ le máaxo’ob patjo’olt u múuch’il Dioses Mayas.
“Ku p’éelilchajal le ka’ap’éel bix u na’at’al t’íinchak balak’ ook, ba’ale’ u nooyil Rudase’ leti’ u kaxtik u mu’uk’ankunsa’al u na’at’al biikláa tumen ko’olel yéetel ka béeyak u táakpajal ti’ keetilo’ob, tumen to’on ko’olelo’one’, k’a’abéet kch’aik kmuuk’ ti’ le kuxtala’, ts’o’okole’ t’íinchak balak’ ooke’ jach k’a’anan ti’al u béeytal”, tu ya’alaj.
En español: Anuncian primera carrera femenil de bicicleta de montaña en Mérida: Conoce los detalles
Kex tumen jaaj u k’áato’ob u táakmuk’t ko’olel oka’an ti’ le noj deportea’, láayli’ xan ku páajtal u ts’íibtik u k’aaba’ máax ku beertik chéen ti’al u náaysik u yóol, ts’o’okole’ tak ti’ leti’ob kun ts’a’abil tak u medaayail, tu tsikbaltaj.
Ana Claudia, tu ya’alaje’ ya’abach juntéenake’, ko’olele’ ku kuchik tuukulo’ob jets’a’an yóok’olo’ob kéen u beeto’ob deportée, le beetike’, yéetel keetil kun beetbil jach chéen u ti’al ko’olele’, táan u kaxta’al u táaukmuk’ta’alo’ob, beyxan u líik’sa’al u yóolo’ob ti’al u káajsiko’ob wa ma’ u p’atiko’ob nat’ biikláa.
“Tene’ xnat’ biiklaen MTB, ba’ale’ ya’abach juntéenake’ ku tukulta’ale’ deportée chéen u ti’al xiib, ba’ale’ ma’ beyi’”. Le beetik oota’ab beetbil jump’éel kúuchil ti’al u káajsa’al u luk’sa’al le tuukulo’oba’.
Kex ma’ ojéela’an jach ba’ax bejil kun áalkabtbile’, ma’ tun xáantal kéen ts’a’abak k’ajóoltbil, ba’ale’ yaan u ts’a’abal ja’, mekaanikóo áantaj, áambulaansya yéetel tuláakal ba’ax kun k’a’abéetchajal te’e bejo’.
Xak'alutskíinsa'an tumen: Sasil Sánchez Chan
