U múuch’kabil Fundación de Parques y Museos de Cozumel (FPMC) tu k’a’aytaje’ yanchaj 570 u túul u mejenil káak’náabil áak ti’ u jatsk’iinil u yantalo’ob, tu jáail jailo’ob Campamento Tortuguero de Punta Sur, tu’ux ojéelta’abe’ k’uch e’el 292 u túul áak. Ti’ le je’elo’, 100 u túule’ u jejeláasil Caretta Caretta (caguama) yéetel 192 Chelonia mydas (sak wa ya’ax).
“Táanili’ u beeta’al jejeláas meyajo’ob ti’al u kaláanta’al le ba’alche’a’, tumen sajbe’entsil yanik u ch’éejelo’ob. U beeta’al ba’ax uts u ti’ale’ jets’a’an ti’ Nuevo Acuerdo por el Bienestar y Desarrollo de Quintana Roo, péektsilta’an tumen xjala’ach, Mara Lezama Espinosa”, beey úuchik u ts’o’olol tumen máax jo’olbesik u kúuchilCentro de Conservación y Educación Ambiental (CCEA), Rafael Chacón Díaz.
En español: Nacen las primeras tortugas marinas de la temporada en Cozumel
Tu ya’alaje’, ts’o’ok u jach ts’aatáanta’al xíimbal-kalanil ku beeta’al lalaj áak’ab, ti’al u kaxta’al tu’ux yaan u k’u’ le áako’obo’, tumen beyo’ ku yutstal u kaláanta’al, ts’o’okole’ yóok’lal le beyka’aj ts’o’ok u yila’al yaane’, ku tukulta’ale’ chan nonoj le kun síijilo’obo’, tumen ti’ le jo’op’éel winalo’ob ku xáantal u k’iinil u ya’abtalo’obe’, óoli’ u ka’ap’éelil le ku bin u ts’o’okola’.
Beey túuno’, máax p’ata’an u jo’olbes u teeknikóo meyajil Campamento Tortuguero Punta Sur, Ricardo Peralta Muñoz, tu ya’alaj te’e p’isk’iin táan u máana’, jtóop’ je’ yaan ti’ ukp’éel k’u’ob, tu’ux yanchaj 570 u túul le mejen áak. Leti’obe’ ts’o’ok u bino’ob ich ja’, ti’al u káajal u líik’ilo’ob.
Tu tsikbaltaj xane’ u táakpajal aj-áantaj máako’ob ti’al u kaláanta’al u áakilo’ob FPMC, jach k’a’anan, tumen sáansamal najmal u xíimbalta’al jáal ja’ob dée áak’ab, ts’o’okole’ yaan k’iine’ ku beeta’al kéen píik’ik, tumen leti’e’ kéen e’elnako’ob.
Xak'alutskíinsa'an tumen: Sasil Sánchez Chan
