U mola’ayil Secretaría de Educación Pública (SEP) tu ts’áaj k’ajóoltbil u tsolk’iinil kaambal, tu’ux jets’a’ab 190 u p’éel u k’iinilo’ob xook ti’al u ja’abil 2023-2024, ts’o’okole’ leti’e’ kun k’a’abéetkunsbil tu xookil préeskolaar, primaryaa yéetel séekundaryaa ti’al kaaj, beyxan le pribaadaso’ob yaan ichil tuláakal u noj lu’umil México, tu’ux ku kaambal maanal 24 miyoonesil xoknáalo’ob.
U káajbal xooke’ yaan u yúuchul 28 ti’ agosto, yéetel tukulta’an u ts’o’okol 16 ti’ julio ti’ u ja’abil 2024, tu’ux jóok’sa’an waxakp’éel k’iino’ob ti’al u meyajta’al konseejo teeknikóo eskoláar tumen ajka’ansajo’ob yéetel u jo’olpóopilo’ob najil xook, tu’ux ku mina’antal xook ba’ale’ chéen ti’ paalal.
En español: SEP revela calendario escolar 2023-2024: Así quedan los feriados y 'puentes'
Beey túuno’, tsolk’iine’ tu beetaj u k’as k’uuxil ajka’ansajo’ob tumen ku ya’aliko’ob SEPe’ ma’ táan u ch’a’anuktik leti’obe’ ts’o’ok ka’analo’ob; yéetel ku tsa’ayal tak síndrome de burnout, ku chíikpajal kéen jach ka’anak u yóol máak yéetel ku p’áatal ma’ ki’imak u yóol kéen meyajnak ikil u seen yantal ba’al u beeta’al. Lela’ ku yu’ubiko’ob yóok’lal le seen ju’uno’ob ku yantal u na’aksal ti’ Internet, u yantal u yu’ubal u taatatsil xoknáalo’ob, tumen “ku taasa’al paalal ma’ jach uts u yóoli’, tumen u yuumo’obe’ ma’ tu jach e’esiko’ob yaabilaj wa ma’ no’oja’anob ti’al u líik’siko’ob juntúul paal”.
Uláak’ ba’ale’, ti’ le túmben ja’abil xook kun káajalo’, ma’ tun jach yantal u k’iinilo’ob tu’ux ku xóot’ol xooki’. Le yáaxo’, ti’al u k’iinil 15 ti’ septiembre, tumen ku k’iimbesa’al Independencia de México. U ka’atéenil u xóot’ol xooke’, yaan u yúuchul le lunes 20 ti’ noviembre ku taala’, ba’ale’ láayli’ te’e k’iino’obo’ yaan xan u beeta’al kóonsejo teknikóo ti’al viernes 24 láayli’ ti’ le winalo’. 2 ti’ novimebree’ mina’an xook, ba’ale’ chéen ti’al jueves, tumen u k’iinil Finadóos. U yóoxp’éelile’ yaan u yúuchul ti’al 5 ti’ febrero ti’ u ja’abil 2024, yóok’lal Promulgación de la Constitución mexicana. Ka’alikil u kamp’éelile’ ti’al 18 ti’ marzo; ti’al mayoe’ ma’ tu xóot’ol xook tumen u yáax k’iinile’ ku lúubul miércoles yéetel 15e’ beyxan.
Ku chíikpajal xan te’e tsolk’iino’, jets’a’an 1 tak 15 ti’ febrero ti’ le ja’ab ku taalo’, u k’iinil ti’al u yáax k’u’ubul u k’aaba’ paalal ti’al ka oojko’ob kaambal.
Xak'alutskíinsa'an tumen: Sasil Sánchez Chan
