Ts’o’ok maanal lajunp’éel ja’abo’ob káajak u meyaj Catia Lattouf de Arída, máax ku ch’a’ak u kaláant ts’unu’un ucha’an loob ti’, wa mina’an u maamaobe’ ti’al u jáalk’abtik kéen ts’o’okok. Tuláakal le ba’alo’oba’ tu yotoch ku beetik, tu noj kaajil Ciudad de México.
“Déede tin paalil káajak in chíimpoltik u kuxtal ba’alache’ tumen máanen ichil u múuch’il boy scout", tu ya’alaj Lattouf ti’ k’áatchi’ tsibkal. Tu tsikbaltaje’, ka’ach 7 u ja’abile’, e’esa’ab ti’ bix u yaabiltik ba’alche’ yéetel xíiwo’ob.
Walkila’, 73 u ja’abil. Ti’ le ts’ook 11 ja’ab máanja’ane’, leti’e’ ba’ax ku meyatika’, u kaláantik ts’unu’un, tu jo’oloj u píitjo’olt u ts’unu’usil koolóon, wa kaanséer, ba’ale’ ma’ chéen le chan ch’íich’ ku kaláantik, tumen ku kaxtik xan u yáantik uláak’ máako’ob kéen tsa’ayak wa ba’ax k’oja’anil ti’ob.
U yotoche’, ti’ yaan tu múuch’kajtalil Polanco. Óoli’ beey jump’éel kúuchil ts’akyaj ti’al ts’unu’un; ku tukulta’ale’ le chan ch’íich’a’ u chíikulal u jeel kuxtal wíinik ichil maaya miatsil.
En español: ''Hospital'' de colibríes da vida a estas aves heridas y huérfanas en CDMX
Tu yotoche’ ku kóojol ts’unu’un, yaan k’iine’ loobilta’an wa óol talam yanik ikil u k’askúunta’al tu’ux ku yantalo’ob; ku ts’a’akal yéetel ku ka’a líik’sa’alo’ob tumen Catia yéetel tumen Cecilia, máax áantik tu yotoch. Ku ch’a’ak’abta’al ts’unu’un tak kéen u yilo’ob ku yutstal u xik’nal tu juunal.
Ba’ale’, te’e najo’ ku k’uchul uláak’ ch’íich’o’ob ma’ tu béeytal u xik’nalo’ob. U ti’alo’obe’, Catiae’ tu ts’áaj jump’éel kúuchil ti’al u yantalo’ob yéetel ti’al u yáantiko’ob le beyka’aj ku páajtal tak kéen kíimiko’ob.
Catia ku tiskbaltike’ káaj u kaláantik ts’unu’un ka’ach jach táan oka’an tu wíinkilal u k’oja’anil ts’unu’us; leti’ ku máan u k’iin ka’aj k’uch Gucci, juntúul u mejenil ts’unu’un kaxta’ab yóok’ol bej tumen juntúul ko’olel, ba’ale’ jujump’íitil úuchik u na’atik ba’ax unaj u beetik ti’al u kaláantiko’ob.
Kex ma’ u yojel mix ba’al yóok’lal ts’unu’une’, tu t’anaj juntúul u áamigo béeterinaaryóo ti’al u tso’olol ti’ ba’ax k’a’abéet ti’al u yáantik, beyxan ba’ax ts’aako’ob k’a’abéet ti’, u yo’och yéetel u jeel ba’alo’ob.
Xak'alutskíinsa'an tumen: Sasil Sánchez Chan
