Juntúul nu’ukul jbeeta’an tumen surcoreanail máako’obe’ chíikpaj tu táan jump’éel u múuch’ paaxil Seúl, jayp’éel k’iino’ob paachil, ts’o’okole’ jach uts úuchik u k’a’amal tumen máaxo’ob cha’antej yóok’lal bix jach ma’alob u meyaj.
EveR 6, androidée p’isik 1.8 meetróos u ka’analil, wa’alaj tu táan 60 u túul u ajpaaxilo’ob Orquesta Nacional de Corea del Sur.
Beey túuno’ EveR 6e’ tu múul jo’olbesaj paax yéetel juntúul wíinik tu tséel; xáanchaj kex media ooráa, ts’o’okole’ u’uya’ab tumen maanal 950 máako’ob, tu kúuchil Teatro Nacional de Corea.
En español: Robot dirige un concierto en Corea del Sur y encandila a la audiencia
Nu’ukule’, beeta’ab tumen Instituto de Tecnología Industrial de Corea, ts’o’okole’ meyajta’ab ti’al u béeytal u jach péek je’el bix u beetik juntúul wíinik, tumen u ts’o’omele’ beeta’ab yéetel téeknolojiyáa ti’al u kanik péek. Kex beyo’, walkila’ ma’ tu tsa’aytal u’uyaj wa u jáan beetik wa ba’ax te’e súutuko’.
Máaxo’ob beete’ táan u meyajo’ob ti’al u béeytal u péeksik u yich kex ma’ próogramarta’ani’, tu tsolaj Lee Dong-wook, u íinjenyeeroil robot.
Xak'alutskíinsa'an tumen: Sasil Sánchez Chan
