Tu jo’oloj maanal jump’éel semaanáa jp’áat k’aalil jump’éel cheem tu áaresiifeil Madagascar tu bakpach’il u ja’ilo’ob Sisal, Yuxatáne’, u mola’ayil Procuraduría Federal de Proteccion al Ambiente (Profepa) tu ts’áaj k’ajóoltbile’ k’askúunta’ab kex 87 meetróos ti’ kuxtal yaan te’e ich ja’o’.
Yóok’lal xaak’alo’ob beeta’ab tu’ux jp’áat cheeme’, ila’ab tumen mola’aye’, le nukuch ba’alo’ ti’ ets’ekbal yóok’ol u t’o’ol kuxtal áaresiifée, tu’ux yaan tuunicho’ob yéetel u jejeláasil korales.
Le 87 metroso’ leti’e’ beyka’aj jíiltpaj cheem yóok’ol le áaresifeo’, tu’ux tu pech’aj u koralil k’áak’ (Millepora complanata), gorgonáceos koral yéetel jayp’éel u kaajilo’ob koral scleractinios (Solenastrea Hyades y Agaricia agaricites).
En español: Barco encallado en Sisal dañó 87 metros del arrecife ‘Madagascar’: Profepa
Ba’ale’, kex tumen Profepa tu ya’alaje’ nojoch loobilaj le úucho’, mina’an u kaajilo’ob k’askúunta’ab ti’ le táakbesa’an unaj u kaláanta’al ichil NOM-059-SEMARNAT-2010.
Xaak’alo’ob ich ja’e’ jbeeta’ab tumen máaxo’ob ku meyajo’ob tu mola’ayil Profepa tu lu’umil Yucatán, u meyajnáalilo’ob Secretaría de Marina (Semar) yéetel Comisión Nacional de Áreas Naturales Protegidas (Conanp).
U cheemil Grande Senegal, ti’alinta’an tumen italianail mola’ay Grimaldi Lines, táan u meyaj ti’al u béeytal u tse’elel te’e tu’ux yano’. Tak walkila’ ma’ káajak u wéekel kóombustiiblée mix xan teejel u kaaskoil.
Xak'alutskíinsa'an tumen: Sasil Sánchez Chan
