U kúuchil Academia de Lenguas Mayas de Guatemala (ALMG) tu tsolaj noj meyaj yaan tu pach, tumen ti’ ku k’a’ayta’al jejeláas ba’alo’ob yóok’lal maaya t’aan te’e noj lu’umo’, tumen yaan 22 u p’éel máasewal t’aano’obi’.
Beey úuchik u ya’alal tu múuch’ tsikbalil “Proyectos de investigación en lingüística y cultura maya”, tu k’iimbesajil Feria de las Lenguas Indígenas Nacionales (Flin) 2023, táan u beeta’al Chan Kaaj Santa Cruz; yaan u ts’o’okol tak 12 ti’ agosto.
Manuel Raxuleú Ambrocio, máax jo’olbesik ALMG, máax xan t’anik k’iche t’anee’, tu ya’alaje’ táan u múul meyajo’ob yéetel u jala’achil Guatemala ti’al u ka béeytak u yantal a’almajt’aano’ob, tu’ux ka béeyak u kéet kuxtal máasewal kaajo’ob, tumen le je’elo’ jump’éel ba’al mantats’ u k’áata’al ka úuchuk te’e kaajo’.
En español: Desde Guatemala trabajan en la preservación y difusión de la lengua maya
Maaya t’aano’obe’, tu ya’alaj, ku yu’uba’alo’ob México beyxan Guatemala; le yano’ob te’e yáax noj lu’umo’, óoli’ “talam” yaniko’ob, tumen ma’ jach mu’uk’anta’ako’obi’.
“Táan ktaasik, yéetel tuláakal k-utsil óole’, jayp’éel noj meyajo’ob táan kbeetik ti’al ktsikbaltik te’ex, ba’ale’ beyxan taak k-u’uyik ba’ax táan xan a meyajtike’ex ti’al a ts’aatáantike’ex t’aan.
AMLGe’ táan u beetik jump’éel nu’ukbesaj tu’ux ku jach kaxta’al ka meyajnak mola’ayob ti’al u ka’a líik’siko’ob t’aan”, tu ya’alaj Manuel Raxuleú.
Te’e súutuko’, táakpaj xan Valentín Ailón Alcón, juntúul jchalchiteco t’aan; Francisco Pedro Miguel, máax t’anik maaya akateko yéetel Ramona Margarita Domingo Díaz, máax u yojel xjakaltekoil t’aan.
Xak'alutskíinsa'an tumen: Sasil Sánchez Chan
