Te’e k’iino’oba’, ka’alikil táan u beeta’al u noj k’iimbesajil máasewal t’aano’ob tu noj kaajil Felipe Carrillo Puertoe’, táan u yantal jejeláas meyajo’ob, tu’ux ku múuch’ul maaya t’aano’ob, yéetel máaxo’ob beetik jejeláas nu’ukbesajo’ob ti’al u yantal u muuk’il le t’aana’, ikil táan u chíikpajal táan u bin u ch’éejel.
Beey túuno’, ichil ba’ax tsikbalta’al tu k’iinil jo’oljeak jueves, tu kúuchil Casa de la Cultura, te’e noj kaajo’, k’a’ayta’ab ba’ax u beelal yéetel ba’ax u tuukulil u meyajil Péekbal Waye’, tu’ux a’alabe’ yéetel le je’elo’ táan u kaxta’al u yajal u tuukul kaaj ti’al u líiks’a’al le maaya t’aano’; najmal u chíikpajal bix u táakpajal kaaj ti’ le meyaja’, tumen chéen ja’alil beyo’ yaan u béeytal u líik’il u muuk’. U náayile’, ka béeyak u kuxtal máak ich maaya t’aan ti’ je’el tu’uxak ka xi’ik. Te’e súutuko’, táakpaj Yazmín Novelo, Socorro Cauich yéetel Lilia Hau.
Beyxan u múuch’kabil Global Voices, tu beetaj jejeláas tsikbalo’ob yéetel súutuk kaambalo’ob, tu’ux táakpaj máaxo’ob táan u péektsiltiko’ob t’aan ti’ nu’ukulo’ob je’el bix Internet yéetel u jeel díijital ba’alo’ob. Te’e k’iina’, táakpaj Alfredo Hau yéetel u meyajil Úuchben ts’íib ti’al túumben kaaj, ti’ u lu’umil Yucatán; Margarita Martínez yéetel u tsikbalil Snichimal jbats’i k’optik: un diálogo desde la lingüística antropológica, ti’ u lu’umil Chiapas, ichil uláak’o’ob.
Beyxan, tsikbalta’ab jejeláas ba’alo’ob yóok’lal ba’ax yaan u yil yéetel u sutt’aan beyxan k’ext’aan tu noojol-lak’inil Méxicoe’ táakpaj Dalila Cauich, Mayusa Gonzáles yéetel Nilvia González, máaxo’ob tu tsikbalto’ob ba’ax talamil ku máansik juntúul máax meyajtik ba’al beya’, tumen ma’ chéen ch’a’abil le meyajo’; ko’oj u beeta’al yéetel ma’ tu chúukpajal u bo’olil, tu ya’alajo’ob te’e súutuko’.
Ba’ax ku taal
Cha’ane’ tukulta’an u ts’o’okol 12 ti’ agosto. Yaan uláak’ e’esajilo’ob, tsikbalo’ob yéetel cha’ano’ob tu kaajil Tihosuco, yaan ba’al u yil yéetel janalo’ob, beyxan u k’a’ananil paax yéetel káan iik’ ti’ilil, u ka’ansa’al maaya t’aan yéetel áaplikasyoones, ichil uláak’ ba’alo’ob. Ku páajtal u xak’alta’al ba’ax yaan te’e noj meyaja’, tu Facebookil Instituto Nacional de Lenguas Indígenas.
Xak'alutskíinsa'an tumen: Sasil Sánchez Chan
