Tu winalil agosto ti’ u ja’abil 2022e’ káaj u líik’il u yook u múuch’ paaxil Orquesta Infantil y Juvenil ti’ u Ayuntamientoil u noj kaajil Jo’, jump’éel meyaj ts’o’ok u ch’a’ak u muuk’ ti’al u chíikbesik yaan paalal no’ojantako’ob ti’al paax. 21 u túul paalal yéetel táankelemo’ob táaka’ani’. Walkila’ ts’o’ok u jach kaambalo’ob tu k’ab María Lourdes Farias Echeverría, máax beetik u súubdirektoorail Cultura, máax pata’an u k’aaba’ beey Malú.
Yáax paax beeta’ab tumen le múuch’a’, úuch le 16 ti’ enero máaniko’. Ts’o’ok u kanik u paxo’ob ba’ax ts’íibta’ab tumen Bach, ba’ale’ beyxan tak u paaxil bíideojuegóos.
“Ts’o’ok 12 u p’éel réepertoryóos kjóok’sik, ichilo’obe’ ti’ yaan Bach, Beethoven, paax suuka’an u yu’ubal Yucatán, tu noj lu’umil México, beyxan u paaxail bíideojuegóos, ichil uláak’o’ob… táan kmeyaj ti’al u yutsil táakpajal paalal yéetel táankelemo’ob, ts’o’okole’ tak leti’ob ku béeytal u ya’aliko’ob beey ba’ax taak u kan u paxo’ob; lelo’ jump’éel ba’al jach k’a’anan, ti’al u táakpajalo’ob ti’ tuláakal le meyajo’, yéetel ti’al u yu’ubalo’ob, tumen k’a’abéet u kaniko’ob bix u beeta’al paaxo’ob je’el bix le je’elo’”, tu ya’alaj Malú Farías ti’ tikbal tu beetaj yéetel La Jornada Maya.
En español: Orquesta Infantil y Juvenil de Mérida, un año formando agentes artísticos
Paax u beetmajo’obe’, u’uya’an tumen kex 2 mil 500 máako’ob. Tu múuch’ paaxil paalal yéetel táankelemo’ob ti’ u Ayuntamientoil u kaajil Jo’e’ táaka’an byóolinistáas, máaxo’ob paxik byooláa, byóoloncheelóo, kóontrabajóo, aarpáa, pianóo, báateryáa yéetel tróompetáa.
Malúe’ tu ya’alaje’, tu jo’oloj jump’éel ja’ab káajak u beeta’al meyaj tumen mola’aye’, jach ki’imak u yóol tumen tu bin u ch’a’ak bej, yéetel tumen ts’o’ok tak u paax ti’ kúuchilo’ob je’el bix Centro Cultural Olimpo.
Tu kúuchil Facebook Malú Faríase’ ku béeytal u k’ajóolta’al ba’ax e’esajilo’ob yéetel cha’ano’ob ku taal u k’iin yéetel múuch’ paax.
Xak'alutskíinsa'an tumen: Sasil Sánchez Chan
