Ti’al u chíimpolta’al bix u beeta’al meyajo’ob, beyxan bix u nu’ukil u beeta’ale’, u mola’ayil Instituto Yucateco de Emprendedores (Iyem) yéetel Fondo Nacional para el Fomento de las Artesanías (Fonart) tu ts’áajo’ob k’ajóoltbil u páayt’aanil Primer Concurso Estatal de Arte Popular.
Le je’ela’ yaan u k’a’alal tak le 13 ti’ octubre ku talaa’, yéetel ku béeytal u táakpajal máaxo’ob meyajtik ki’ichkelem nu’ukulo’ob yéetel póol che’ wa kij; fíiligranáa; uláak’ ba’alo’ob je’el bix aak’, luuch, leek, chúuj wa kookóo; beyxan jats’uts nu’ukulo’ob, je’el bix le ku beeta’al yéetel neek’o’ob, u púuts’il kij, yéetel baak.
Beey túuno’, tuláakal taak’in kun t’oxbile’ yaan u chukik 100 mil pesos, ts’o’okole’ 16 u p’éel jaatsilo’ob kun jóok’sbil ti’.
En español: Llaman a artesanos y artesanas a participar en el Concurso Estatal de Arte Popular
“Yéetel le ketlama’ táan k-kaxtik klíik’sik u yóol máaxo’ob beetik ki’ichkelem ba’al yéetel u k’abo’ob tu lu’umil Yucatán, ti’al ma’ u jáawal u beetiko’ob, tumen leti’obe’ ya’abach ba’al ku patjo’oltiko’ob, ts’o’okole’ ti’ yani’, ma’ k-k’áat ka xu’uluki’, le beetik to’one’ ma’ k-k’áat ka p’áatak chéen ti’ náajal taak’ini’, tumen kex ma’ u náajalo’obe’, k-k’áat ka konchajak ba’ax ku beetiko’ob, ikil u k’ajóolta’al ba’ax ku beetiko’ob”, tu tsikbaltaj Elena Vázquez, máax jo’olbesik u meyajil óoperaasyones yéetel proyeektóos ichil Fonart.
Paulina Viana, máax jo’olbesik Desarrollo Artesanal ti’ u mola’ayil Iyeme’, tu ya’alaj ketlame’, je’ek’a’ab u ti’al máax ts’o’ok 18 u ja’abilo’ob yéetel ka u ye’eso’ob kex jump’éel diseenyóo meyajta’an chéen tumen juntúulili’ máak, ts’o’okole’ ma’ u chuk mix jump’éel ja’ab beeta’aki’.
Yáax kúuchile’ ti’ lalaj jaatsile’ yaan u náajaltik 8 mil pesos, u ka’ap’éelile’ 5 mil yéetel u yóoxp’éelile’ 3 mil. Beyxan yaan u ts’a’abal noj chíimpolal, máax ti’ yaan u k’u’ubul 20 mil pesos, ti’al u asab ma’alobil nu’ukil ichil tuláakal Yucatán. U k’u’ubul chíimpolalo’obe’ yaan u yúuchul 31 ti’ octubre.
Xak'alutskíinsa'an tumen: Sasil Sánchez Chan
