U bin u ko’ojtal ba’al yéetel u tuklik máak je’el u talamtal ba’al tu paachil k’iine’, ts’o’ok u beetik u jelpajal ba’ax ku manik máak tu lu’umil México ti’al u yantal jach chéen ba’ax k’a’abéet ti’, beyxan u túuntik uláak’ maarkáas ti’al u chan éensik u tojol ba’ax ku xupik yéetel u manik xan ba’alo’ob ma’ túumbentako’obi’, beey chíikpaj ti’ k’áatchi’ beeta’ab tumen EY.
Ichil ba’ax chíikpaj ti’ túumben xaak’al meyajta’ab tumen mola’ay beetik áawditoryáas, íimpuestóos, kóonsultoryáa yéetel tráansaxionées, ku k’aaba’tik EY Future Consumer Index, tu lu’umil Méxicoe’ ts’o’ok u jach k’éexel bix u yúuchul máan, tumen wíinike’ ku kaxtik ba’alob ma’ jach ko’ojtako’obi’ ba’ale’ tu’ux láayli’ toj u yóol, tumen ka’ache’ wíinike’ ku táanilkunsik yóok’ol kaab, ts’o’okole’ toj óolal.
Beey túuno’, u 32 por sientoil mexikoilo’ob k’áatchibta’abe’ tu táanilkunsaj toj óolal; tu paache’ chíikbesa’ab u ma’anal ba’al ma’ jach ko’ojtaki’ tumen 24 por siento máak núuk beyo’; u kaláanta’al yóoik’ol kaabe’, 21 por siento; kaaje’ 13 por siento yéetel experiensyaae’, 10 por siento.
Tu winalil octubre ti’ u ja’abil 2022e’, ku táanilkúunsa’al ka’ach yóok’ol kaab, tumen beey a’alab tumen u 34 por sientoil mexikoil k’áatchita’abo’ob; 21 por sientoe’, toj óolal; experiensyaae’ 16 por siento; u ma’anal ba’al ma’ jach ko’ojtaki’, 15 por siento, yéetel kaaje’ 14 por siento.
Ti’ lajuntúul máax k’áatchibta’abe’ waktúul tu núukaje’ yáax ba’ax ku kaxta’ale’ leti’ u ma’anal ba’al ma’ jach ko’ojtaki’, yéetel u 35 por sientoile’ ma’ tu tuklik wa je’el u chen éemel u ko’ojil ba’al tu noj lu’umil Méxcio te’e ja’aba’. Ts’o’okole’, u 60 por sientoil máake’ chi’ichnak tumen tu jach ko’ojtal sáasil, gaas yéetel ja’.
Uláak’ ba’ale’, u 55 por sientoil máax k’áatchibta’abe’, tu ya’alaje’ yáax ba’ax u ti’alo’boe’, toj óolal, ba’ale’ chi’ichnako’ob yóok’lal u tojil u yóol u tuukul.
Xak'alutskíinsa'an tumen: Sasil Sánchez Chan
