Téeknolojikóo nojoch mola’ay Googlee’ táan u túuntik yéetel jaytúul máaxo’ob k’a’abéetkunsik le nu’ukula’, jump’éel nu’ukbesaj ku ts’áak u páajtalil u kaxta’al k’aayo’ob ti’ YouTube tak chéen wa ku k’as k’a’ayal wa ka táabsa’ak le k’aayo’, beey jts’a’ab k’ajóoltbil tumen le mola’ayo’ ti’ k’a’aytajil ts’íib.
"Wa táakbesa’anech ti’ le xaak’al táan u beeta’ala’, chéen najmal a bin tu’ux ku ya’alik ku kaaxan túumben k’aayo’ob kéen xmáaman k’a’ayak wa ba’ax, wa kéen táakbsa’ak k’aay ku kaxta’al, ba’ale’ naj u xáantal maanal óoxp’éel segundóos ti’al u béeytal u k’ajóolta’al yéetel u kaxta’al”, a’alab tumen mola’ay.
En español: YouTube prueba una herramienta para buscar canciones tarareándolas
Le je’ela’ ma’ jump’éel ba’al túumben ti’al Googlei’, tumen le je’elo’ káaj u beetik tu ja’abil 2020. Ba’ale’, le nojoch mola’aya’ tu ya’alaj ti’ TechCrunche’, kex tu ka’ap’éelil nu’ukbesaj ku meyaj yéetel le miismo téeknolojiyaae’, le táan u meyaj ti’ YouTube maas séeb u meyaj keetel yéetel le u ti’al Googleo’, tumen u ti’al le je’elo’ k’a’abéet u yu’ubik ichil 10 yéetel 15 segundóos ti’al u na’atik ba’ax k’aayili’.
Tu ja’abil 2002e’, Applee’ tu jóok’saj Shazam, nu’ukbesaj ti’al u k’ajóoltik k’aayo’ob óoli’ je’ex le je’elo’obo’.
Xak'alutskíinsa'an tumen: Sasil Sánchez Chan
