U jala’achil u lu’umil Yucatáne’ tu k’a’aytaj u nu’ukbesajil “Mes del Testamento” tu’ux yaan u yáanta’al kaaj ti’al ma’ u yantal u bo’otik, wa ti’al u p’íitchajal u bo’olil, najmal u beeta’al kéen jo’p’ok u beeta’al u ju’unil téestamento, ichil u winalilo’ob septiembre yéetel octubre.
Beey túuno’, u jóok’sa’al jump’éel u ju’unil téestamento oloografóo, k’ajóolta’an beet u téestamentoil puño y letrae’ ma’ táan u tojoltik mix ba’al, ka’alikil u beeta’al téestamento tu táan Notario Público chéen yaan u tojoltik le beyka’aj jets’a’an tumen Colegio Notarial de Yucatán unaj u bo’ota’al ti’al le ja’aba’, 2 mil pesos.
Beyxan a’alabe’, kéen beeta’ak téestamentóo tu táan Notario Públicoe’ yaan xan u yéensa’al u tojol ti’al wíinik ts’o’ok 60 u ja’abil, yéetel máaxo’ob yaan ti’ob wa ba’ax díiskapasidaad, ti’al u yantal u bo’otiko’ob chéen mil 600 pesos yóok’lal. Ichil túun máaxo’ob oka’ano’ob ti’al le utsila’, ti’ yaan xan éenfermeros yéetel páaramedikóos táan u meyajo’ob walkila’, yéetel u meyajnáalilo’ob Secretaría de Seguridad Pública (SSP).
Ti’al u béeytal u beeta’al téestamento tu táan Notario Públicoe’ k’a’abéet u áaktail náasimiento máak, CURP, jump’éel íidentifikaasyóon yaan u yoochel máax beetik le ju’uno’ yéetel ka’atúul testigóos.
En español: Mes del Testamento en Yucatán traerá descuentos de hasta 100 por ciento: consulta los requisitos
Tu péetlu’umil Yucatáne’ yaan 134 u túul notaryóos je’el u béeytal u beetiko’ob le k’a’anan ju’una’.
Uláak’ ba’ale’, wa yaan máax taak u beetik u ju’unil téestamento de ts’íib k’abile’, ku páajtal u t’aan Archivo Notarial ti’al u tsolnu’uktal bix u beeta’al, tumen ti’al u béeytale’ k’a’abéet ts’o’ok 18 u ja’abil máax beetik, beyxan u yojel xook yéetel ts’íib, yéetel najmal u beetik ka’atéen u ts’íibil, jach je’el bix beeta’abik le yáaxo’; u k’u’ubul u óorijinalil yéetel u yoochel INE, CURP yéetel u áaktail náasimiento, je’el bi xan u k’u’ubul u láapiseroil yéetel le ts’íibta’ab le ju’uno’. Ti’al u beeta’ale’, k’a’abéet u t’aan máak (999)9303022, extensión 53287 ti’al u k’áata’al jump’éel sitáa.
Ma’ tun bin k’ambil ju’uno’ob beeta’an yéetle maakináa, mix ti’ kóomputadoráa w beeta’an tumen yaanal máak ti’ le máax k’áatiko’. Wa ma’ u yojel, wa ma’ tu béeytal u xook mix u ts’íibi’, ma’ táan u béeytal u beeta’al téestamento oloografóo, yéetel yaan u yantal u beeta’al tu táan Notario Público. Ti’al u yojéelta’al uláak’ ba’alo’obe’ k’a’abéet u túuxta’al ts’íib te’ela’: [email protected].
Xak'alutskíinsa'an tumen: Sasil Sánchez Chan
