U kúuchil Centro Peninsular en Humanidades y Ciencias Sociales (CEPHCIS) ti’ u noj najil xook UNAMe’, yaan u beetik u meyajil IV Jornada Regional de Prevención del Suicidio, le 8 ti’ septiembre ku taala’, tu Auditorioil u kúuchil Rendón Peniche CEPHCIS, ti’ le UNAMo’. Laura Hernández Ruiz, xka’ansaj ku meyaj te’e kúuchilo’, leti’e’ máax jo’olbesik le meyaja’.
Beey túuno’, meyaje’ yaan u chúunsa’al láas 8:30 ja’atskab k’iin. P’el u ts’o’okole’ yaan u beeta’al u noj tse’ekil Comportamiento suicida y muerte por suicidio, tumen Arsenio Rosado Franco, máax jo’olbesik Centro Integral de Salud Mental (Cisame) Yucatán.
En español: Alistan Jornada Regional de Prevención de Suicidio en Mérida
“U xaak’alta’al jejeláas ba’al yaan ba’al u yil yéetel u tselik máak u kuxtal ichil junjaats kaaje’, ts’o’ok u jach much’ik meyaj ya’abach máako’ob ti’ jejeláas díisisplináas. Ba’ale’, kex ts’o’ok u máan ya’abach ja’abo’o káajak u beeta’ale’, láayli’ u jach yantal wíinik ku kíinsikubáaj, ts’o’okole’ ma’ táan u beeta’al nu’ukbesajo’ob ka u séeb ts’aatáanto’ob ichil u poliitikáasil kaaj ku beeta’al ti’al ka ch’éeneko’ob. Le túune’, Jornadae’ táan u kaxtik u ye’esik le noj talamil yaana’, ti’ jejeláas paakato’ob, ti’al beyo’ u béeytal u patjo’oltal uláak’ meyajo’ob yéetel poliitikáas ka u beet u chan ch’éenel le talamila’ tu noj lu’umil Yucatán” tu tsikbaltaj Hernández Ruiz.
Ichil Jornada Regional de Prevención del Suicidio yaan u yantal ukjaats tsikbalo’ob tu’ux yaan u táakpajal máako’ob jach kaambanaja’ano’ob yóok’lal: “El suicidio y la educación”; “El suicidio y la psicología “; El suicidio y la medicina”; “El suicidio y las ciencias sociales”, “El suicidio y los medios de comunicación”; “El suicidio y el arte”; “Asociación y el suicidio”.
Le meyaja’ yaan u beeta’al le 8 ti’ septiembre ku taala’, láas 8:30 ja’atskab k’iin tak 8 áak’ab, ti’ kúuchil yaan yóok’ol u bejil 43 s/n, ichil 44 yéetel 46, tu koloonyail Industrial.
Xak'alutskíinsa'an tumen: Sasil Sánchez Chan
