Úuchben ch’i’ibalo’ob yéetel kaajo’obe’ suukchaj u beetiko’ob jejeláas ba’alo’ob ti’al u mayjta’al poolo’ob yéetel u baakel u pool wíinik. Yaanal bixij, ba’ale’ walkila’ láayli’ u beeta’al jayp’éel ba’alo’ob yóok’lal ichil tuláakal yóok’ol kaab. Chéen ba’axe’ te’e k’iino’oba’ ajxak’al xooko’obe’ tu kaxtajo’ob uláak’ u chíikulal chuk pool beeta’ab ti’ úuchben Asia.
Ka’alikil beeta’ab páan meyajo’ob tu’ux ets’laj u yúuchben kaajil Honghe, tu xaman-lak’inil China, tu chúumukil mileenyóo V a.C., tu’ux kaxta’ab tumen arkeeologóose’, 14 u p’éel kaajo’ob, tu’ux yanchaj 69 u p’éel chej baakel, wa eskeeletóo, ts’o’oke’ ti’ le je’elo’obo’ 41e’ xota’an u kaalo’ob, yéetel tuláakal baake’ u ti’al ko’olel yéetel paalal.
Ts’o’okole’, yanchaj uláak’ muukilo’ob tu’ux kaxta’ab u baakel u pool xiibo’ob, máaxo’ob ku tukulta’ab k’ucho’bo te’elo’, úuchik u k’u’ubul ti’ máaxo’ob loots’najij, beey jts’a’ab k’ajóoltbil ti’ jump’éel ts’íib jts’a’ab k’ajóoltbil tu pikil ju’unil Archaeological and Anthropological Sciences.
Te’e ts’íibo’ ku ya’alale’ kaxta’ab u reestosil 33 máako’ob -32 ti’ le je’elo’obo’ mina’an u poolo’obe’- ich ka’ap’éel najo’ob, tu’ux muka’an u ya’abil le reestoso’. Ts’o’okole’ naats’ ti’ jump’éel ti’ le najo’obo’, kaxta’ab xan uláak’ muuk tu’ux yaan ka’ach kamp’éel u baakel u pool nojoch máako’ob, yéetel ma’ kaxta’ab mix uláak’ jump’éel baakeli’.
