Carolina Gómez
U mola’ayil Comisión Federal para la Protección Contra Riesgos Sanitarios (Cofepris) tu ts’áaj k’ajóoltbile’ yaan uláak’ waxakp’éel túumben mola’ayo’ob ku xma’ no’ojan k’i’itbesik nu’ukulo’ob ti’al ts’aakáankil ichil tuláakal u noj lu’umil México.
A’alabe’ leti’ le je’elo’oba’: “Iván Misael Mora Venadero, Farmacia Estelar, Armonía Pharma y AD Medical, tu péetlu’umil Jalisco; Prodhosp y Distribuidora San Rafael, Ciudad de México; Soluciones Médicas y Hospitalarias, tu péetlu’umil Aguascalientes yéetel Alfredo Armando Muñoz Mitlich tu péetlu’umil Chihuahua”.
Ichil ba’ax ila’ab tumen Cofepris ma’ patal yéetelo’obe’, ti’ yaan tumen ku koniko’ob “u nu’ukulil ts’akyaj ma’ jaajtako’obi’, ts’o’okole’ mina’an xan u reejistroil tu noj lu’umil México, yéetel le tu’ux ku líiks’a’al ts’aak ku koniko’obe’ ma’ xan no’ojan yanik u ti’al”, ichil uláak’ ba’alo’ob. Ichil jayp’éel ba’ax ila’ab te’e mola’ayo’obo’, ti’ yaan: Farmacia Estelare’ xíimbalta’ab ti’ le kúuchil ku chíikpajal te’e fáakturao’ kéen koonolnak, ba’ale’ kex tumen kaxta’ab le najo’, mina’an mix jump’éel ts’íib wa ba’ax chíikbesik kúuchil koonol. Ka’alikile’, AD Medical xot’a’ab meyaj ti’, tumen ka’aj xíimbalta’abe’ ila’ab “mina’an u p’iisil téemperaturáa k’a’abéet ti’al u líik’sa’al ts’aako’ob, tumen mina’an mix jach u p’íitil ba’ax k’a’abéet ti’ kúuchil ti’al u yutsil beeta’al”. Ts’o’okole’, yaan tak poolo’ob beeta’an tu táan Cofepris. Beyxan Prodhospe’ taka’ab u pool tumen “ku konik ts’áak yéetel nu’ukulo’ob ma’ jaajtaki’, ts’o’okole’ ojéela’an ti’ ku k’a’aytik tu kúuchil Internet”.
Coferpise’ tu beetaj páayt’aan ti’al u xak’alta’al u k’aaba’ mola’ayo’ob tu’ux ku ma’anal nu’ukulo’ob yéetel ts’aako’ob, ti’al ka jach ila’al máakalmáako’ob yano’ob ichil le 123 u p’éelal ma’ no’oja’an yanik u meyajo’obi’, tumen ma’ tu beetiko’ob ba’ax jets’a’an ichil a’almajt’aani’.
