Tu jatsk’iinil Edad de Piedra, ti’ lu’um k’ajóolta’an bejla’a’ beey Namibiae’, yanchaj jejeláas póol meyajo’ob beeta’ab tu’ux chíikbesa’ab u chíikulal wíinik yéetel ba’alche’ob, ts’o’okole’ meyajta’an tak tu beelile’ le beetik ku páajtal u yila’al ba’ax ba’alche’ilo’ob, beyka’aj u ja’abil beyxan wa xiib, wa ko’olel ba’alche’il.
Póol meyaj beeta’ab ti’al u ye’esa’al u pe’echak’ ba’alche’ yéetel wíinike’ ku chíikpajal ti’ úuchben jejeláas póol tuunich kaxta’an ichil tuláakal yóok’ol kaab. Beey túuno’, tu noj lu’umil Namibiae’ chan nonoj yaani’, tu’ux ku yila’al ajts’oono’ob yéetel aj-joocho’ob tu jaats k’iinil Edad de Piedra tardía.
Ba’ale’, u ya’abil xaak’al beeta’ab yóok’lal úuchben its’ate’, much’a’an chéen ti’ ba’alo’ob yaan ba’al u yil yéetel formas jeomeetrikáas, ts’o’okole’ ma’ jach táaj ya’ab ba’al xak’alta’an yóok’lal pe’echak’o’ob, kex tumen chan yaan ti’ tuláakal yóok’ol kaab.
Ti’ túumben xaak’al jts’a’ab k’ajóoltbil tu pikil ju’unil PLOS ONE, Andreas Pastoors, máax ku meyaj tu noj najil xook Friedrich-Alexander-Universität Erlangen-Nürnberg (Alemania), yéetel u yéet meyajo’obe’, a’alabe’ béeychaj u xak’alta’al bix úuchik u máan xíinximbal máasewalo’ob tu desyeertoil Kalahari, ti’al u yila’al u pe’echa’ak ba’alche’ob yéetel wíiniko’ob, yéetel u yáantajil úuchben its’at tu noj wiitsilo’ob Doro Nawas, tu chúumukil Namibia occidental.
Ajxaak’alo’obe’ béeychaj u jets’iko’ob ba’ax ba’alche’il, beyxan wa xiib wa xch’up, beyka’aj u ja’abil yéetel tak máakalmáak ookil yéetel le pe’echak’najo’obo’, tak yóok’ol u 90 por sientoil, ti’ le 513 u p’éel póol meyaj xak’alta’abo’obo’. Ti’ meyaj beeta’abe’ e’esa’ab úuchben its’at beeta’abe’ ku ye’esik u jejeláasil ba’alche’ob kuxlajo’ob te’e k’inako’obe’.
Xak'alutskíinsa'an tumen: Sasil Sánchez Chan
