Ti’al u ts’a’abal k’ajóoltbil bix le bak’ ku meyajta’al tu péetlu’umil Yucatáne’, yaan u beeta’al tu k’iinilo’ob 27, 28 yéetel 29 ti’ octubre u noj k’iimbesajil bak’, Festival de la carne, tu’ux yaan u mu’uch’ul u jach táaj ma’alobil máaxo’ob meyajtik yéetel beetik bak’ tu noojol-lak’inil Yucatán yéetel yaan xan u táakpajal u múuch’ paaxil Moenia.
Xma’ bo’olil u yokol máak tu k’iinil viernes yéetel domingo, ba’ale’ ti’al sábadoe’ yaan u tojoltik 250 pesos le jéeneralo’, yéetel mil pesos ti’al VIP, tumen yaan u táakpajal u múuch’il Moenia. U boletosile’ ku ko’onol tu kúuchil Carnes Santa Fé yéetel Palacio Municipal de Tizimín.
Yaan u chúunsa’al cha’an láas 5 u taal u chíinil k’iin yéetel yaan u káajal kéen t’áabak u k’áak’il “Asando la Vaca de Carnes Santa Fe”, ts’o’oke’ kéen áak’abchajake’ yaan u ts’a’abal show tumen El Chino Fernández yéetel yaan u paax Los Super Caracoles.
Tu k’iinil domingo 29 ti’ octubre yaan u beeta’al u keetil Concurso Parrillero Amateur yéetel yaan u paax Habana Swing.
Ichil jayp’éel ba’alo’ob tsikbalta’ab tumen u jo’olpóopil Tizimín, Pedro Couoh yéetel tumen Jorge André Díaz Loeza, máax jo’olbesik Comité Organizador ti’ le cha’ano’ yéetel máax xan jo’olbesik Secretaría de Desarrollo Rural (Seder), a’alabe’ tu péetlu’umil Yucatáne’ ku beeta’al lalaj ja’abe’ 33 mil tóoneladasil bak’, ts’o’oke’ yaan kex 400 mil u túul wakax ku tséenta’al.
Couohe’ tu ya’alaje’ le ja’ab máaniko’ píitmáan le beyka’aj máak k’ama’ab te’e cha’ano’, ts’o’oke’ tuláakal máaxo’ob meyajtik bak’e’ chan koonolnajo’ob tu beel, le beetik te’e ja’aba’ táan u páa’tal ka yanak maanal 50 mil máako’ob te’e k’iino’obo’.
Xak'alutskíinsa'an tumen: Sasil Sánchez Chan
