U mola’ayil Secretaría de Salud de Yucatán (SSY) tu ts’áaj k’áajóoltbile’, wa táan u yilik máak yaan ba’ax chíikbesik táan u tsa’ayal u k’oja’anil deenguee’ jach najmal ma’ u lu’uk’ul mix jump’éel ts’áak wa ma’ a’alan beey unaj u beeta’al tumen juntúul ts’akyaji’, tumen yaane’ jach je’el u talamkúunsik k’oja’anile’.
Le beetike’, u mola’ayil toj óolalae’ tu k’áataj ti’ kaaj ma’ u lu’uk’ul ácido acetilsalicílico, ibuprofeno, metamizol sódico, diclofenaco yéetel naproxeno sódico tumen je’el u beetiko’ob u maas yantal sajbe’entsil ti’ u kuxtal wíinik wa tumen jaaj táan u tsa’ayal le k’oja’anilo’.
En español: Estos medicamentos debes evitar en caso de presentar síntomas de dengue
Beyxan a’alabe’, jach k’a’anan ma’ u ts’akikubáaj tu juunal, yéetel ka yanak u bin máak tu kúuchil ts’akyaj maas naats’ yaan ti’ máak. Uláak’ ba’ax a’alab ma’alo’obe’, leti’ u yu’uk’ul ja’ mantats’ yéetel u je’elsikubáaj máak ku tsa’ayal le dengeo’.
Uláak’ ba’ax k’áata’abe’, tak wa yaan, wa mina’an u chokwil máake’, kéen u chuk u yóoxp’éel k’iinil yéetel u wukp’éel k’iinil k’oj’ana’e’ láayli’ je’el u yantal uláak’ ba’axo’ob e’esik yaan sajbe’entsil, je’el bix u k’i’k’ankil máak, u yantal u xejil, u yaantal u nak’ máak wa u yu’ubik jach táaj ka’anan.
Xak'alutskíinsa'an tumen: Sasil Sánchez Chan
