Ti’al u ts’atáanata’al u toj óolal ko’olel Jo’e’, u ayuntamientoil kaaje’ táan xan u táakmuk’tik ba’ax táan u beeta’al ti’al u yila’al ma’ u tsa’ayal u ts’unusil iim, wa kaanser de maamáa. Le beetike’, táan u beetik jump’éel nu’ukbesaj xma’ bo’olil, tu’ux táan u beeta’al maastografiasil, yéetel uláak’ ba’alo’ob ti’ u múuch’kajtalilo’ob u kaajil Jo’, yéetel u bak’pachilo’ob.
Meyaje’ táan u taal u beeta’al tumen u mola’ayil Dirección de Salud y Bienestar Social, yéetel ichil ba’ax u jeel ba’ax táan u beeta’ale’, ti’ yaan u kóonsultail yéetel ultrasonido jíinekolojikóo, óodontolojia, síikolojia yéetel nutrisyóon, ti’al u séeb ts’atáanta’al k’oja’ano’ob. Ts’o’oke’ tuláakal le je’elo’obo’, xma’ bo’olil u beeta’al.
U jo’olpóopil u noj kaajil Jo’, Renán Barrera tu ya’alaje’, u ts’unusil iim ku tsa’ayal ti’ ko’olele’, leti’e’ ba’ax asab ya’ab u kíinsik, le beetike’ k’a’anan u péektsilta’al najmal u kaláantikubáaj manats’ ti’al u séeb ila’al wa tumen tu tsa’ayal ti’ máak.
En español: Ofrecen estudios de mastografía gratis este octubre en Mérida: ¿Qué se requiere?
Beey túuno’, u kúuchil u beeta’al máasatografiae’ je’eb le 3 ti’ octubre máaniko’, yéetel yaan u p’aátal tak 31 ti’ octubre. Ti’ ts’a’aban Plaza Grande ti’al u ts’atáanta’al xma’ bo’olil tuláakal ko’olel bin u k’áatej.
Beyxan, tu ya’alaje’, yaan xan u béeytal u k’áata’al le estudioso’ tu kúuchil Centro de Atención Médica a la Mujer (CAMM) yaan yóok’ol u bejil 88-A número 311-D, ichil 141 yéetel 143, Emiliano Zapata Sur II.
Máax jo’olbesik u mola’ayil Salud y Bienestar Social, Ildefonso Machado Domínguez, tu ya’alaje’, ti’al u béeytal u k’áata’al jump’éel estudioe’ k’a’abéet táant u yichkíil ko’olel kéen xi’ik yéetel ma’ unaj yaan u íimplantesi’, mix xan u ts’áamaj u taalkoi’, u ki’i bokil mix déesodorante. Uláak’ ba’ale’, maas ma’alob wa u búukintmaj bluusa, faldaa wa páantaloon.
Ti’al máaxo’ob kun bino’ob CAMMe’, unaj u yáax k’áatiko’ob siitáa tu numeroil 9994296653.
Xak'alutskíinsa'an tumen: Sasil Sánchez Chan
