Te’e k’iino’oba’, béeychaj u tso’olol u transcriptomail u yoot’el yéetel u k’áanil u éeskeletikóo muuk’il juntúul u ba’alche’il tigre de Tasmania, tijikúunsa’ab walkil 130 ja’abo’ob paachil.
Ba’alche’ ts’aka’an tu beel tumen oksa’an ich jump’éel síis kúuchil yaan Museo Sueco de Historia Natural, ti’ u kaajil Estocolmo. Le beetike’, béeychaj u xak’alta’al ti’al u yojéelta’al bix yanik u jenetiikail, ti’al u taal ilbile’ jach óole’ je’ex u ti’al máarsupiales ku yantalo’ob te’e k’iino’oba’.
Tigre de Tasmaniae’, k’ajóolta’an xan beey tilacino. Juntúul máarsupial suukchaj u jaantik bak’, k’i’itpaj ti’ australianoil lu’um, yéetel tu petenil Tasmania.
Le ba’alche’a’ ch’éej ka’aj k’uch europeoilo’ob kajtal te’elo’, tumen a’alabe’ jach ku máano’ob u mult paak’áalo’ob, le beetik ti’al u ja’abil 1888e’, jets’a’ab u bo’ota’al jump’éel libráa ti’ máax bíin u kíins juntúul ti’ le je’elo’obo’. U ts’ook tigreil Tasmaniae’ ojéelta’ab yanchaje’, kíim ka’ach tu kaláanta’al tu ja’abil1936, tu kúuchil Zoológico Beaumaris, tu kaajil Hobart, Tasmania.
Ba’ax mola’ab ti’ u yoot’ele’, béeychaj u ye’esik u ARNil u muuk’il le ba’alche’o’, yéetel beychaj u ts’íibta’al jeenes ma’ k’ajóolta’an ka’ach ti’ u ARNil ribosómicoil yéetel ti’ microARNil.
Xak'alutskíinsa'an tumen: Sasil Sánchez Chan
