U jala’achil u noj lu’umil Méxicoe’ yaan u káajsik, bejla’a lunese’, u ts’áak u báakunail Covid-19 yéetel influenza estacional, ti’al u béeytale’ yaan u k’a’abéetkunsik maanal 54,6 miyoonesil doosis ti’al máaxo’ob ku tukulta’an táaka’an ichil múuch’o’ob najmal u táanilkunsa’alo’ob.
“U tuukulile’, leti’e’ ka béeyak u ts’a’abal 54.6 miyoonesil doosis; ti’ le je’elo’obo’, 35,2 miyoonese’ ti’al influenza yéetel 19,4 miyoonese’ ti’al SARS-CoV-2. Yéetel le je’ela’ táan u kaxta’al u p’íitkunsa’al u sajbe’entsil u yantal u yoksa’al máak tu najil ts’akyaj yéetel jaytúul máak ku kíimil yóok’lal le k’oja’anilo’oba’”; a’alab tumen u mola’ayil Secretaría de Salud (SSA) ti’ k’a’aytajil ts’íib.
Mola’ayo’obe’ tu ya’alo’obe’ u báakunail ti’al influenzae’ ku kaláantik máak ti’ u jejeláasil k’oja’anil ku maas talamkúunsik u toj óolal wíinik: ka’ap’éel de tipo A yéetel ka’ap’éel de tipo B.
En español: Con más de 54 millones de dosis, México iniciará vacunación contra Covid-19 e influenza
Ka’alikil túune’, ti’al Covid-19, yaan u ts’a’abal ti’ kaaj baakuna meyajta’ab tu lu’umil Cuba, Abdala, beyxan le meyajta’ab Rusia, Sputnik V, “tu ka’ap’éelile’ jets’a’an no’oja’antako’ob yéetel séeba’an u meyajo’ob ti’al u kaláantik kaajnáalo’ob, ts’o’oke’ ejéenta’an u k’a’abéetkunsa’al tumen u mola’ayil Comisión Federal para la Protección contra Riesgos Sanitarios (Cofepris)”, jets’a’ab tumen SSA.
Báakunase’ yaan u ts’a’abal ti’ máaxo’ob táaka’an ichi u jaatsil kaaj ku tukulta’al maas ma’ mu’uk’antaki’, je’el bix máaxo’ob ts’o’ok u chukik 60 u ja’abil, beyxan máaxo’ob ku meyaj tu mola’ayilo’ob toj óolal, ko’olel oka’an tu yáax óoxp’éel winalo’ob yo’omil, beyxan máaxo’ob yaan u ja’abil ichil 5 tak 59 ba’ale’ yaan xan u jeel k’oja’ano’ob beetik u p’áatal ich sajbe’entsil u toj óolalo’ob.
Ka’alikile’, máaxo’ob ichil 6 tak 59 u ja’abile’ chéen u baakunail influenza estacional kun ts’a’abil ti’ob.
Ma’ seen úuche’, u jala’achil u noj lu’umil Méxicoe’ tu k’a’aytaj úuchik u manik maanal 10 miyoonesil báakunáas, kex ma’ tu ya’alaj máakalmáak u maarkail tu’ux u taal, ts’o’oke’ yaan u nupa’al ti’ le 9.3 miyoonesil doosis yaan u meyaj ti’al u k’iinilo’ob ke’el.
Xak'alutskíinsa'an tumen: Sasil Sánchez Chan
